थोडक्यात माहिती...

• सोयाबीन दरात सुधारणा, प्रक्रिया प्लांट व पेंड मागणीमुळे तेजी

• मेथी दरात मोठी घसरण, बाजारात आवक वाढली

• हळद दर स्थिर; सणामुळे मागणी वाढली, पण निर्यात अनिश्चित

• लसूण बाजार भावात स्थिरता; आवक चांगली

• पपई दर टिकून; कमी आवक आणि सणामुळे मागणी कायम

Market Bulletin:

सोयाबीनचे भाव सुधारले

सोयाबीनच्या भावात मागील २ आठवड्यांपासून सुधारणा दिसून आली. आंतरराष्ट्रीय बाजारात आणि देशात सोयातेलाचे भाव वाढले आहेत. पोल्ट्री उद्योगाकडून सोयापेंडलाही उठाव मिळत असल्याने पेंडेचे दर वाढले आहेत. तर प्रक्रिया प्लांट्सकडे सोयाबीनचा साठा खूपच कमी आहे. त्यामुळे प्लांट्स खरेदी करत आहेत. नाफेड आणि एनसीसीएफ सोयाबीनची खरेदी कमी करत आहेत. यामुळे देशात सोयाबीनच्या दरात सुधाऱणा झाली. सोयाबीनला सरासरी ४ हजार ५०० ते ४ हजार ८०० रुपयांच्या दरम्यान दर मिळाला. सोयाबीनचे दर पुढील काळातही कायम राहू शकतात, असा अंदाज अभ्यासकांनी व्यक्त केला. 

मेथीचे दर नरमले

बाजारात मेथीची आवक वाढल्यानंतर दरातही नरमाई दिसून आली. मेथीचा सरासरी दर आठवडाभरापुर्वी प्रतिजुडी १० ते १४ रुपये होता. तो आता ३ ते ८ रुपयांपर्यंत कमी झाला आहे. राज्यातील बहुतांशी भागांत मेथीची काढणी सुरु झाली. त्यामुळे बाजारात आवक वाढत आहे. क्विंटलमध्ये मेथीला १ हजार ते १५०० रुपयांच्या दरम्यान गुणवत्तेप्रमाणे दर मिळत आहे. मेथीची बाजारातील आवक पुढील काळातही टिकून राहण्याची शक्यता आहे. त्याचा दरावर दबाव राहू शकतो, असा अंदाज बाजारातील व्यापारी व्यक्त करत आहेत. 

हळद दर टिकून 

हळदीला सणांमुळे काहीशी मागणी वाढत असल्याचे व्यापारी सांगत आहेत. मात्र, हळदीची बाजारातील आवकही वाढलेली दिसत आहे. त्यामुळे हळदीचे दर स्थिर आहेत. हळदीला सरासरी प्रतिक्विंटल १० हजार ते १२ हजार रुपये दर मिळत आहे. हळदीच्या यापुढे सणासुदीच्या काळात चांगली मागणी येणार आहे. मात्र, जागतिक बाजारात सुरु असलेली अनिश्चिततेचा परिणाम हळदीच्या निर्यातीवरही होत असल्याचे निर्यातदारांचे म्हणणे आहे. याचाही दरावर परिणाम दिसून येत आहे. मात्र, पुढील काळात सणांमुळे मागणी वाढल्यानंतर दरातही वाढ दिसून येईल, असा अंदाज हळद बाजारातील अभ्यासकांनी व्यक्त केला. 

लसणाचे भाव स्थिर

राज्यातील बाजारात लसणाची आवक चांगली सुरु आहे. त्यामुळे दरातही स्थिरता दिसून आली. परराज्यातूनही लसूण विक्रीसाठी राज्यात येत आहेत. परिणामी लसणाचा पुरवठा चांगला दिसत आहे. लसणाची आवक पुणे, मंबई, नाशिक, नागपूर अशा मोठ्या बाजारात जास्त दिसत आहे. तर सरासरी दरपातळी ६ हजार ते ७ हजार रुपयांच्या दरम्यान आहे. पुढील काही आठवडे लसणाची आवक स्थिर राहू शकते. मात्र पहिल्या पावसानंतर लागवड केलेला लसूण बाजारात आल्यानंतर आवक सुधारण्याची शक्यता आहे. त्यामुळे दरावर आणखी दबाव येऊ शकतो, असे व्यापारी सांगत आहेत. 

पपई दर टिकून

पपईला मागणी असतानाच बाजारातील आवक मात्र कमी आहे. त्यामुळे पपईच्या दरात मागील दोन आठवड्यांमध्ये सुधारणा झाली होती. पपईचे हे दर टिकून आहेत. सध्या राज्यात पपईचे उत्पादन कमी आहे. त्यातही दर्जेदार पपईची टंचाई भासत आहे.  राज्यातील बाजारातही पपईची मागणी आहे. उत्तर भारतातूनही मागणी आहे. त्यामुळे शेतकऱ्यांना जागेवर सध्या १६०० ते १८०० रुपये प्रतिक्विंटलचा दर मिळत आहे. श्रावणमास व अन्य कारणांमुळे पपईला मागणी आहे. दुसरीकडे बाजारात पपईची आवक कमी आहे. त्यामुळे पुढील काही आठवडे दर स्थिर राहू शकतात, असा अंदाज पपई बाजारातील व्यापाऱ्यांनी व्यक्त केला. 

वारंवार विचारले जाणारे प्रश्न (FAQ)

१. सोयाबीनचे दर का वाढले आहेत?
पेंड व तेलाला मागणी वाढल्याने दर सुधारले आहेत.

२. मेथीच्या दरात घट का झाली?
राज्यभरात मेथीची काढणी आणि आवक वाढल्यामुळे.

३. हळदीच्या निर्यातीवर काय अडचण आहे?
जागतिक बाजारातील अनिश्चिततेचा परिणाम हळदीच्या निर्यातीवर झाला आहे.

४. लसणाचे दर पुढे कसे राहतील?
नव्या लसणाची आवक वाढल्यास दरावर दबाव येऊ शकतो.

५. पपईचे दर टिकतील का?
आवक कमी आणि मागणी कायम असल्याने दर टिकण्याची शक्यता आहे.