Nashik News: ‘नाफेड’ कांदा खरेदीतील भ्रष्टाचार नियंत्रित करण्यासाठी यंदा पहिल्यांदाच सहकारी संस्थांच्या माध्यमातून कांदा खरेदी होत आहे. मात्र यामध्ये अवसायनात गेलेल्या संस्थांकडून खरेदी सुरू असल्याचा गंभीर प्रकार जिल्हा उपनिबंधक कार्यालयाने बजावलेल्या नोटिशीवरून समोर आला. या पार्श्‍वभूमीवर ‘नाफेड’ ने गंभीर दखल घेतली आहे. केंद्र व राज्य शासनाचे मार्गदर्शन घेऊन कारवाईची तयारी सुरू केली आहे.
कांदा खरेदीचे कंत्राट मिळण्यासाठी ‘बाळासाहेब ठाकरे अटल नावीन्यपूर्ण सहकारी संस्थे’ने अर्ज केला होता. पुढे अटी शर्तीनुसार कागदपत्रे सादर केल्यानुसार संबंधित संस्थेला पात्र ठरवले. संबंधित संस्थेची कागदपत्रे खरेदी केंद्र निवड समितीने तपासल्यानंतर पात्र ठरली. प्रत्यक्ष कांदा खरेदी सुरू झाल्यानंतर नाफेड नाशिक शाखेच्या अधिकारी व प्रतिनिधींनी या केंद्राच्या कामकाजाची पाहणी केली तेव्हा त्यांना गैरप्रकार दिसून आला नाही, असे अधिकाऱ्यांचे म्हणणे आहे.
१८ जुलै रोजी राज्य सरकारच्या सहकार, पणन व वस्त्रोद्योग विभागाच्या माध्यमातून केंद्र शासनाच्या किंमत स्थिरीकरण योजनेंतर्गत ‘नाफेड’ व ‘एनसीसीएफ’मार्फत होणाऱ्या कांदा खरेदी केंद्रांवर दक्षता समितीची नियुक्ती करण्यात आली. त्यामुळेच जिल्हा उपनिबंधकांनी संस्थांची माहिती घेत असताना चौकशी केल्यानंतर ‘बाळासाहेब ठाकरे अटल सहकारी संस्था’ अवसायनात असल्याचे पुढे आले. त्यानंतर संस्थेची खरेदी थांबवण्याची नोटीस जिल्हा उपनिबंधकांनी ‘नाफेड’ला बजावल्याने हा सावळा गोंधळ समोर आला.
संबंधित संस्थेने काम मिळवताना कागदपत्रे स्वसाक्षांकित करून जमा केली आहेत. यामुळे प्रथमदर्शी ‘नाफेड’ची चूक नाही, असे त्यांचे अधिकारी सांगतात. मात्र यंदाच्या खरेदीतही काही बडे नेते, भांडवलदार व परप्रांतीय व्यक्तींचा समावेश असल्याची चर्चा आहे. त्यामुळे निवड प्रक्रियेत अधिकाऱ्यांनी आर्थिक देवाण-घेवाण करून याकडे डोळे झाक केली का? असा संशय बळावला आहे.
पोर्टलवर काम थांबवले
जवळपास ५,००० क्विंटल कांदाखरेदी संबंधित संस्थेला देण्यात आली होती. त्यापैकी ८० टक्के खरेदी पूर्ण झाली. केंद्र सरकारच्या किंमत स्थिरीकरण योजनेअंतर्गत खरेदी केलेला ६ कोटींचा कांदा संबंधिताच्या ताब्यात असल्याची माहिती मिळत आहे. तो ताब्यात घेण्यासाठी हालचाली सुरू आहेत. याशिवाय संबंधित संस्थेचे शिल्लक खरेदी थांबवली आहे. खरेदीपश्चात कांद्याचा साठा अधिकृत नोंदणी होण्यासाठी वापरल्या जाणाऱ्या ‘सप्लाय व्हॅलीड पोर्टल’वरील ‘लॉगिन’ बंद केले आहे. पुढील चौकशी सुरू असून, याबाबत संस्थेकडे खुलासा मागवला होता. संस्थेने आपली बाजू वकिलामार्फत मांडल्याचे सूत्रांनी सांगितले.
ॲग्रोवनचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.
