Akola News: यंदाच्या हंगामात केळीची मोठ्या प्रमाणात इराणमध्ये निर्यात सुरू आहे. अकोट तालुक्यातील पिंप्री खुर्द येथील प्रगतिशील शेतकरी स्वप्नील गजानन रावणकार यांच्या शेतातील निर्यातक्षम केळीची कापणी शुक्रवारी (ता.एक) झाली. या वेळी कृषी विभागाचे अधिकारी, शेतकरी, खरेदीदार उपस्थित होते.

पिंप्री खुर्द येथील केळी उत्पादक श्री. रावणकार यांनी लागवड केलेल्या केळीची इराणमध्ये निर्यात करण्यात आली.

या वेळी उपविभागीय कृषी अधिकारी तुषार ढंगारे, प्रभारी तालुका कृषी अधिकारी अश्विनी बिराजदार, सहायक कृषी अधिकारी गजानन शिंगणे, सहायक कृषी अधिकारी संकेत पाटील कृषी सेवक अक्षय पाचपोर, महाराष्ट्र राज्य शेतकरी केळी उत्पादक संघाचे राज्य समन्वयक सचिन कोरडे यांची प्रमुख उपस्थिती होती.

‘‘आपल्या भागातील केळी परदेशात निर्यात करणे ही आपल्या सर्व शेतकऱ्यांसाठी अभिमानाची गोष्ट असून इतरही केळी उत्पादक शेतकऱ्यांनी सुधारित लागवड तंत्रज्ञानाचा अवलंब करून निर्यातक्षम केळी उत्पादन करावे, त्यासाठी कृषी विभागाकडून मार्गदर्शन केले जाईल,’’ असे श्री. ढंगारे यांनी सांगितले. अश्विनी बिराजदार यांनीही या वेळी मार्गदर्शन केले. श्री. कोरडे यांनी निर्यात प्रक्रियेविषयी माहिती दिली.