Chhatrapati Sambhajinagar : तुडुंब होण्याच्या उंबरठ्यावर असलेल्या जायकवाडी प्रकल्पातून सोमवारी (ता. ९) दुपारी १२ ते १ वाजेदरम्यान सहा दरवाज्यांतून ३,१४४ क्युसेकने गोदावरी पात्रात पाण्याचा विसर्ग सुरू करण्यात आला आहे.

त्यासाठी सहाही दरवाजे ०.५ फूट उघडण्यात आले असल्याची माहिती जायकवाडी धरण (नाथसागर) नियंत्रण कक्षाकडून देण्यात आली.

सोमवारी सकाळी ६ वाजता जायकवाडी प्रकल्प (नाथसागर जलाशय) ९७.३० टक्के क्षमतेने भरला आहे. १०२.७३ टीएमसी क्षमतेच्या या प्रकल्पात ७४.५९ टीएमसी जिवंत तर १००.६५ टीएमसी एकूण पाणीसाठा झाला आहे.

सोमवारी सकाळी सहाच्या सुमारास १५,१४४ क्युसेकने पाण्याची आवक सुरू होती. पाण्याची आवक बघता दुपारी १२ ते १ वाजेदरम्यान गोदावरी नदी पात्रात ३१४४ क्युसेक विसर्ग सुरू करण्याचा निर्णय घेण्यात आला. याशिवाय उजव्या कालव्यातून ५०० क्युसेकने माजलगाव प्रकल्पासाठी विसर्ग सुरू होता.