Pune News: मे महिन्यापासून सुरू झालेल्या पावसाने पुणे जिल्ह्यात भात लागवडीत खोडा घातला आहे. परिणामी भात पिकाची सरासरीच्या ६१ हजार १०१ हेक्टरपैकी ४९ हजार ५५९ हेक्टर म्हणजेच ८१ टक्के लागवड होऊ शकली आहे. त्यामुळे अजूनही भात लागवडीपासून ११ हजार ५४२ हेक्टर क्षेत्र दूर असल्याचे चित्र आहे.

यंदा पूर्वमोसमी पावसाने मे मध्ये सुरुवात केल्याने जिल्ह्याच्या पश्चिम भागात अनेक गावांतील शेतकऱ्यांची शेताची रान भाजणी व भात रोपे टाकण्याची कामे अर्धवट झाली होती. त्यामुळे रोपांची टंचाई भासल्याने भात लागवडी खोळंबल्या होत्या. उसनवारीवर रोपे घेऊन भाताच्या लागवडी करत असल्याने त्याचा उत्पादनावर परिणाम होईल, अशी भीती शेतकऱ्यांनी व्यक्त केली आहे. आता भाताच्या लागवडी अंतिम टप्प्यात आहेत.

मावळ, मुळशी, भोर, राजगड, खेड, जुन्नर, आंबेगाव तालुक्यांमध्ये अनेक ठिकाणी धूळ वाफेवर भात पेरणी केली जाते. तर काही ठिकाणी मॉन्सूनपूर्व पावसाच्या ओलीनंतर पेरणी केली जाते. मात्र, यंदा मॉन्सून लवकर झाल्यामुळे पेरण्या खोळंबल्या.

तालुकानिहाय भात पिकाची लागवड (हेक्टरमध्ये)

तालुका सरासरी क्षेत्र लागवड क्षेत्र टक्के

हवेली २०६४ १७२० ८३

मुळशी ७६६० ५८२२ ७६

भोर ७५०० ६५१७ ८७

मावळ १२,९५० ९४५७ ८७

वेल्हे ५०२५ ४५०३ ९०

जुन्नर ११,१२९ ८४५० ७६

खेड ७७५० ६८७३ ८९

आंबेगाव ५७३७ ५१३१ ८९

दौंड ० ४२ ०