Kharif Sowing 2025: सोयाबीन, कापूस, तुरीची पेरणी कमी; मक्याच्या लागवडीत मोठी वाढ

Pune News: देशात यंदा खरिपाची गेल्यावर्षीच्या तुलनेत ५ टक्क्यांनी पेरणी आघाडीवर आहे. ४ ऑगस्टपर्यंत देशात ९३३ लाख हेक्टरवर खरिपाचा पेरा झाला. आतापर्यंत देशात कापूस, सोयाबीन, तूर आणि उडीदाची लागवड पिछाडीवर आहे. तर भात, मका आणि उसाची लागवड आघाडीवर आहे. भात आणि मक्याला खरिपात शेतकऱ्यांची जास्त पसंती असल्याचे सरकारने जारी केलेल्या पेरणीच्या अहवालातून स्पष्ट होते.

देशात खरिपाचे सरासरी क्षेत्र १ हजार ९६ हेक्टर आहे. यंदा मे महिन्यातच काही राज्यांमध्ये चांगला पाऊस झाला. माॅन्सूनही लवकर आला. देशात जून आणि जुलै महिन्यात पाऊस हवामान विभागाने दिलेल्या अंदाजानुसार सरासरीपेक्षा अधिक झाला आहे. असे असले तरी महाराष्ट्रासह अनेक राज्यांमध्ये पावसाचे वितरण असमान झाले आहे. राज्यातील सव्वादोनशे तालुक्यांमध्ये सरासरीपेक्षा कमी पाऊस झाला आहे. याचा परिणाम पिकांवर होत आहे.

पाऊस वेळेत आल्याने खरिपाचा पेरा मात्र वेळेत होत आहे. यंदा गेल्यावर्षीपेक्षा खरिपाचा पेरा आघाडीवर आहे. देशात ४ ऑगस्टअखेर ९३३ लाख हेक्टरवर खरिपाचा पेरा झाला. गेल्यावर्षी याच तारखेला ८८८ लाख हेक्टरवर खरिप पिकांची पेरणी झाली होती. म्हणजेच यंदाचा पेरा ५ टक्क्यांनी आघाडीवर आहे. उसाची लागवड गेल्यावर्षीच्या तुलनेत आतापर्यंत ३ टक्क्यांनी आघाडीवर आहे. उसाखाली आतापर्यंत ५७ लाख हेक्टरवर झाली आहे.

कापूस २ टक्क्यांनी पिछाडीवर

खरिपात भातानंतर कापसाचे सरासरी क्षेत्र जास्त आहे. कापसाचे सरासरी क्षेत्र १२९ लाख हेक्टर आहे. आतापर्यंत १०६ लाख हेक्टरवर कापसाची लागवड झाली. ही लागवड गेल्यावर्षी याच काळात झालेल्या लागवडीपेक्षा २ टक्क्यांनी कमी आहे. गेले वर्षभर कापसाला हमीभावापेक्षा कमी दर मिळाला. त्यामुळे कापूस उत्पादक राज्यांमध्ये कापसाचे क्षेत्र कमी होत असल्याचे दिसत आहे.

सोयाबीनकडे पाठ ?

देशात गेले वर्षभर सोयाबीनचे भाव दबावात राहीले. त्यामुळे यंदा शेतकऱ्यांचा सोयाबीनकडे कमी कल दिसत आहे. सोयाबीनची लागवड आतापर्यंत गेल्यावर्षीच्या तुलनेत ४ टक्क्यांनी पिछाडीवर दिसत आहे. सोयाबीनचा ११८ लाख हेक्टरवर पेरा झाला आहे. तेलबियांमध्ये केवळ सोयाबीनच नाही तर भुईमूग, सूर्यफूल, तीळ, कारळ्याची लागवड पिछाडीवर आहे. त्यामुळे एकूण तेलबिया पिकांचे क्षेत्रही ४ टक्क्यांनी पिछाडीवर आहे. तेलबियांची लागवड १७१ लाख हेक्टरवर झाली आहे.

मका, भाताला पसंती

खरिपात शेतकऱ्यांची मका आणि भाताला चांगली पसंती दिसत आहे. मक्याची लागवड तब्बल १२ टक्क्यांनी वाढली आहे. मक्याखाली आतापर्यंत जवळपास ९२ लाख हेक्टर क्षेत्र आले आहे. सरासरी क्षेत्रापेक्षा मक्याची लागवड तब्बल १५ टक्क्यांनी वाढली आहे. अंतिम आकडा येईपर्यंत ही टक्केवारी आणखी वाढणार आहे. ज्वारी, बाजरी आणि रागीची लागवड मात्र पिछाडीवर आहे. भाताची लागवडही आतापर्यंत १७ टक्क्यांनी आघाडीवर आहे. भाताखाली आतापर्यंत ३१९ लाख हेक्टरवर लागवड झाली.

तुरीची लागवड पिछाडीवर

शेतकऱ्यांना गेल्या खरिपातील तुरीसाठी भाव मिळाला नाही. त्यामुळे तुरीची लगवड साडेसात टक्क्यांनी पिछाडीवर आहे. आतापर्यंत लागवड ३८ लाख हेक्टरवर झाली आहे. केवळ तूरच नाही तर उडदाची लागवडही पिछाडीवर आहे. मूग आणि इतर कडधान्याची लागवड काहीशी आघाडीवर आहे. त्यामुळे एकूण कडधान्य लागवड गेल्यावर्षीच्या पातळीवर झाली आहे.