Nagpur News: राष्ट्रसंत तुकडोजी महाराज विद्यापीठ, नागपूर, राष्ट्रीय सेवा योजना तसेच जनकल्याणकारी समिती, नागपूर यांच्या संयुक्‍त सहकार्याने शनिवारपासून (ता. ७) तीनदिवसीय विदर्भ पाणी परिषदेचे आयोजन करण्यात आले आहे. मुख्यमंत्री देवेंद्र फडणवीस यांच्या हस्ते या परिषदेचे उद्‍घाटन होणार असून, महसूलमंत्री चंद्रशेखर बावनकुळे प्रमुख पाहुणे म्हणून उपस्थित राहतील.

राष्ट्रसंत तुकडोजी महाराज विद्यापीठ नागपूरच्या वतीने आयोजित या परिषदेत विदर्भातील पिण्याचे पाणी, सिंचन आणि औद्योगिक वापरकामी असलेल्या पाण्यावर चर्चा आणि मंथन होणार आहे. त्या अनुषंगाने पेयजल, कृषिजल आणि औद्योगिक जल अशा तीन परिसंवादांचे आयोजन होणार आहे. पहिली परिषद शनिवारी (ता. ७), दुसरी रविवारी (ता. ८) तर तिसरी परिषद सोमवारी (ता. ९) होईल.

पेयजल परिषदेत विदर्भातील पेयजल समस्या, आव्हाने व उपाय यावर चर्चा त्याबरोबरच दुसऱ्या सत्रात रिसर्च पेपरचे सादरीकरण केले जाईल. कृषी जल परिषदेत विदर्भातील कृषियोग्य पाणी, सद्यःस्थिती, समस्या व उपाययोजना. दुसऱ्या सत्रात विदर्भातील कृषियोग्य पाण्याचा वापर व त्यातील पाणी वापर संस्थांची भूमिका तर तिसऱ्या सत्रात विदर्भातील जलव्यवस्थापनासाठी कार्य करणाऱ्या संस्थांच्या यशोगाथांचे सादरीकरण होईल.

चौथ्या सत्रात विदर्भातील पाणी समस्या व उपाय यावर विद्यार्थ्यांद्वारे निर्मित रील स्क्रीनिंग व स्पर्धा असे उपक्रम राहतील. समोरापीय सत्र सोमवारी (ता. ९) राहणार आहे. या दिवशी औद्योजिक जल परिषद होणार असून, औद्योगिक क्षेत्रातील पाण्याच्या समस्या, आव्हाने व उपाय, विशेष भाषण तसेच समारोपाला विविध स्पर्धांचे बक्षीस वितरण होईल. विद्यापीठाचे व्यवस्थापन परिषद सदस्य डॉ. समय बनसोड, कुलसचिव डॉ. राजू हिवसे, अधिसभा सदस्य डॉ. विजय इलोरकर, शुभांगी नक्षिणे उंबरकर, सुमंत पुणतांबेकर, राज मदनकर, डॉ. सोपानदेव पिसे यांनी परिषदेसाठी पुढाकार घेतला आहे.

...हे करतील मार्गदर्शन

वनामती सभागृहात होणाऱ्या या परिषदेत रविवारी (ता. ८) केंद्रीय मंत्री नितीन गडकरी मार्गदर्शन करतील. या वेळी अध्यक्षस्थानी विद्यापीठाचे कुलगुरू डॉ. प्रशांत बोकारे असतील. समारोपीय सत्राला उच्च व तंत्रशिक्षण मंत्री चंद्रकांतदादा पाटील तसेच पद्मश्री चैतराम पवार यांची विशेष उपस्थिती राहणार आहे.