Water Conservation : आगामी चार वर्षांत एकही गाव पाण्यापासून वंचित राहणार नाही

Ahilyanagar News : पुढील चार वर्षांत राज्यातील आणि देशातील कोणतेही गाव, शेत पाण्यापासून वंचित राहणार नाही. तसे केंद्र सरकारचे नियोजन आहे. देश दुष्काळमुक्त व्हावा, असा पंतप्रधान नरेंद्र मोदी यांचा संकल्प आहे, असे केंद्रीय जलशक्तीमंत्री सी. आर. पाटील यांनी सांगितले.

शासन आपले काम करेल, परंतु जबाबदार नागरिक म्हणून प्रत्येकाने पाण्याचा काटकसरीने वापर केला पाहिजे, गावातील पाणी गावातच अडवून साठवावे, अशी अपेक्षा श्री. पाटील यांनी व्यक्त केली.

अस्तगाव (ता. राहाता) येथे महाराष्ट्र सिंचन सुधारणा कार्यक्रमाअंतर्गत गोदावरी उजवा तट कालव्यावरील मातीकाम, बांधकाम व अस्तरीकरण कामाचे भूमिपूजन शुक्रवारी (ता. २) केंद्रीय जलशक्ती मंत्री पाटील यांच्या हस्ते झाले. पालकमंत्री राधाकृष्ण विखे पाटील, खासदार धनंजय महाडिक यांच्यासह अधिकारी व पदाधिकारी उपस्थित होते.

सी. आर. पाटील म्हणाले, की देशात तेरा लाख स्ट्रक्चर खड्यांच्या माध्यमातून पाणी संचय करण्याची चळवळ राबविण्यात आली. यातून लाखो लिटर पाण्याची बचत झाली, असेही त्यांनी सांगितले. नदी-नाल्यांतील पुराच्या पाण्यापासून कॅनमध्ये पाणी आणण्याची वेळ येऊ नये, यासाठी आजच आपण पाणी बचतीची चळवळ गांभीर्याने घेण्याची गरज आहे.

राज्य शासन सुमारे एक लाख कोटींच्या खर्चातून चार नदीजोड प्रकल्पाच्या माध्यमातून गोदावरी खोऱ्यात ८३ टीएमसी पाणी आणणार असून यातून गोदावरी खोरे कायमचे दुष्काळमुक्त होणार आहे. शासनाने मागील काही वर्षांत राज्यातील १८२ प्रकल्पांना सुधारित प्रशासकीय मान्यता दिली असून यातून २५ लाख ७८ हजार हेक्टर क्षेत्र ओलिताखाली आले आहे.

राज्यातही उपक्रम राबवू

सी. आर. पाटील म्हणाले, ‘‘नैसर्गिकरीत्या जलसंचय ही काळाची गरज निर्माण झाली आहे. यासाठी एक हजार शेतकरी तयार झाल्यास राज्यात व तुमच्या भागात केंद्राच्या एजन्सीमार्फत या भागात पाणी संचय करणारे शोषखड्डे खोदून देण्यात येतील. या शोषखड्ड्यांद्वारे पाणी संचय झाल्यास पुढील वर्षी शेतकऱ्यांनी स्वतः पुढाकार घेऊन ही चळवळ राबवावी.’’