Kolhapur News : ‘अंगणवाडी सेविकांच्या काही मागण्या यापूर्वीच मान्य केल्या आहेत. उर्वरित प्रमुख मागण्यांबाबत मुंबईत बैठक घेऊन दोन दिवसांत निर्णय घेऊ’, असे आश्वासन महिला व बालकल्याण राज्यमंत्री आदिती तटकरे यांनी अंगणवाडी कर्मचाऱ्यांच्या शिष्टमंडळाला दिले.

दरम्यान, संक्रांतीच्या पूर्वसंध्येला मंत्री तटकरे यांना तिळगूळ देऊन अंगणवाडी सेविकांचा सण गोड करण्याची विनंती केली. सरकारी वेतनश्रेणी लागू करण्यात यावी, तोपर्यंत अंगणवाडी सेविकांना किमान वेतन कायद्यानुसार २६ हजार रुपये वेतन व मदतनीसांना २० हजार रुपये वेतन द्यावे,

या प्रमुख मागण्यांसह वेतनकाळातील वेतन कपात करू नये, नूतन अंगणवाडी सेविकांना दिलेल्या नोटिसा रद्द कराव्यात या व इतर मागण्या या वेळी करण्यात आल्या. मंत्री तटकरे म्हणाल्या, की राजमाता जिजाऊ यांच्या जयंतीदिनी अंगणवाडी सेविकांना मोबाइल देण्यात येणार होते, मात्र त्या संपावर असल्याने देता आले नाहीत.

शिवाय त्यांच्या विमा संरक्षणातील प्रलंबित विषयही मार्गी लावले आहेत. ग्रॅच्युअटी व पेन्शनसंदर्भात देखील अंगणवाडी सेविकांच्या कृती समितीच्या बैठकीत सकारात्मक चर्चा झाली आहे. दिवाळीची भाऊबीजदेखील पंधरा दिवस आधीच अंगणवाडी सेविकांच्या खात्यावर जमा केली होती.

महिला व बाल कल्याण विभागाच्या अखत्यारित जेवढे विषय आहेत ते मार्गी लावले आहेत. वेतनवाढीचा प्रश्न मुख्यमंत्री, उपमुख्यमंत्री व अर्थमंत्री यांच्यासोबत चर्चेने सोडवायचा आहे. येत्या दोन दिवसांत मुंबईत बैठक घेऊन त्यावर सकारात्मक निर्णय घेऊ. त्याबरोबरच अंगणवाडी सेविकांना दिलेल्या नोटिसाही रद्द करण्याचे आश्वासन त्यांनी या वेळी दिले.

अतुल दिघे, अप्पा पाटील, सतीश कांबळे, सुवर्णा तळेकर, जयश्री पाटील, शुभांगी पाटील, दिलदार मुजावर, उत्कर्ष पवार, सरिता कारंडे, सविता पवार, मीनाक्षी काशीद, सुनीता जाधव आदी उपस्थित होत्या.