Sangli News : जिल्ह्यात खरीप पिकांची सुधारित पैसेवारी जाहीर करण्यात आली असून, ३७४ गावांची पैसेवारी ५० पेक्षा कमी आहे. आता डिसेंबरमध्ये अंतिम पैसेवारी आल्यानंतर चित्र स्पष्ट होणार आहे. जिल्ह्यातील तीन मंडले वगळता सर्व जिल्हा दुष्काळ शासनाने जाहीर केला आहे. शासनाच्या या निर्णयानुसार शेतकऱ्यांना वीजबिलातील सवलतीसह कर्ज वसुलीही थांबली आहे.

जिल्ह्यात यंदा पावसाने ओढ दिल्याने पिकांना मोठा फटका बसला. जिल्ह्यातील काही तालुक्यांत तर पावसाने १५ ते २० दिवसांपेक्षा जास्त ओढ दिल्याने पिके कोमेजून जात होती. यामुळे उताराही घटला असून, सोयाबीन या प्रमुख पिकावर अनेक ठिकाणी येलो मोझॅकचा प्रादुर्भाव झाला.

तूर, बाजरी, हळदीची वाढ खुंटली होती. त्यामुळे पीकविम्याची मागणी जिल्हाभर होताना दिसत आहे. तीन मंडले वगळता शासनाने जिल्हा दुष्काळ जाहीर केला आहे. जिल्ह्यातील ६३३ खरीप गावे व रब्बी १०३ गावे अशी एकूण ७३६ गावांपैकी खरीप ६३३ गावांची दि. ३१ ऑक्टोबर २०२३ रोजी सुधारित पैसेवारी जाहीर झाली आहे.

त्यात जिल्ह्यातील ३७४ खरीप गावांची पैसेवारी ५० च्या आत आल्याचे दिसून येत आहे. यामध्ये मिरज तालुक्यातील ४१, तासगाव ६९, कवठेमहांकाळ ६०, जत ५४, खानापूर ६८, आटपाडी २६, कडेगाव तालुक्यातील ५६ गावांचा समावेश आहे.

तसेच २५९ गावांची पैसेवारी ५० पेक्षा जास्त आहे. डिसेंबरमध्ये अंतिम पैसेवारी काढल्यानंतरच शासन या पैसेवारीचा विचार करणार आहे. जिल्ह्यात खरीप पेरणीचे दोन लाख ५५ हजार ९८४ हेक्टर आहे. यात खरीप पेरणी केलेले क्षेत्र केवळ एक लाख ५३ हजार ६६ हेक्टर होते.

२५९ गावांची पैसेवारी ५० पेक्षा जास्तच

जिल्ह्यातील मिरज तालुक्यातील ३१, पलूस ३५, वाळवा ९८, शिराळा तालुक्यातील ९५ गावे अशी एकूण २५९ गावांची पैसेवारी ५० पेक्षा जास्त आहे. या गावांमधील खरीप पिकांची अंतिम आणेवारी डिसेंबरमध्ये जाहीर होणार आहे. या पैसेवारीकडे शेतकऱ्यांचे लक्ष लागले आहे.