Agrowon Podcast: डाळिंबाचा बाजार तेजीतच; तोंडली- मका दर टिकून, पेरुचा बाजार स्थिर, तर ढोबळी मिरची नरमली

Market Bulletin:

डाळिंब तेजीतच 

देशात गेल्या दोन वर्षांपासून डाळिंबाचे उत्पादन कमी होत आहे. मागील काही महिन्यांपासून बाजारातील आवक कमी असल्याने डाळिंबाचे भाव तेजीत आहेत. बाजारात विक्रीसाठी येत असलेल्या डाळिंबाची गुणवत्ता कमी असल्याने राज्यात गुणवत्तापूर्ण डाळिंबाची टंचाई भासत आहे. परिणामी या डाळिंबाचे दर तेजीत आहेत. सध्या डाळिंबाला बाजारात सरासरी ९ हजार ते १२ हजार रुपयांचा दर मिळत आहे. बाजारातील डाळिंबाची आवक मर्यादीतच राहण्याची शक्यता आहे. तर दुसरीकडे उठाव चांगला राहील. त्यामुळे डाळिंबातील तेजी टिकून राहील, असा अंदाज डाळिंब बाजारातील अभ्यासकांनी व्यक्त केला. 

तोंडलीचे दर टिकून 

राज्यातील बाजारात तोंडलीचे दर मागील काही आठवड्यांपासून टिकून आहेत. इतर भाजीपाल्याप्रमाणे तोंडली पिकालाही यंदा मे आणि जून महिन्यातील जोरदार पावसाचा फटका बसला आहे. तोंडलीची बाजारातील आवक कमीच आहे. तर दुसरीकडे तोंडलीला बाजारात उठाव असल्याचे व्यापारी सांगत आहेत. त्यामुळे राज्यातील बाजारात तोंडलीला सरासरी ३ हजार ५०० ते ४ हजार रुपयांच्या दरम्यान भाव मिळत आहे. पुढील काही आठवडे बाजारीतल आवक कमीच राहण्याची शक्यता आहे. त्यामुळे तोंडलीचे दरही टिकून राहू शकतात, असा अंदाज व्यापारी व्यक्त करत आहेत. 

पेरुचा बाजार स्थिर

राज्यातील बाजारात पेरुची आवक काहीशी वाढली आहे. मात्र दुसरीकडे पेरुला उठावही चांगला आहे. त्यामुळे पेरुचे दर मागील काही आठवड्यांपासू टिकून आहेत. बाजारात दर्जेदार पेरुची टंचाई असल्याचे पेरू व्यापारी सांगत आहेत. सध्या राज्यात मुंबई, पुणे आणि सोलापूर बाजारात पेरुची आवक काहीशी अधिक दिसत आहे. तर पेरुला सरासरी ३ हजार ते ५ हजार रुपयांच्या दरम्यान गुणवत्ता आणि व्हरायटीनुसार दर मिळत आहे. बाजारातील पेरुची आवक आणि दर पुढील काही आठवडे कायम राहू शकते, असा अंदाज पेरु बाजारातील व्यापारी व्यक्त करत आहेत. 

ढोबळी मिरची नरमली

ढोबळी मिरचीचे दर मागील काही आठवड्यांपासून काहीसे नरमलेले आहेत. राज्यातील काही बाजारांमध्ये ढोबळी मिरचीची आवक काहीशी वाढली आहे. ढोबळी मिरचीला चांगला उठाव असल्यामुळे दरात फारशी घसरण झाली नाही, असे बाजारातील व्यापारी सांगत आहेत. ढोबळी मिरचीला सध्या बाजारात सरासरी गुणवत्तेप्रमाणे ३ हजार ते ३ हजार ५०० रुपयांच्या दरम्यान भाव मिळत आहे. ढोबळी मिरचीची बाजारातील आवक पुढील काही आठवडे कमीच राहण्याची शक्यता आहे. त्यामुळे ढोबळी मिरचीचे दरही तेजीतच राहतील, असा अंदाज व्यापारी आणि अभ्यासक शेतकरी व्यक्त करत आहेत. 

मका बाजार टिकून

मक्याचा बाजार रब्बीतील मालाची आवक झाल्यापासून स्थिरावला आहे. देशात गेल्यावर्षभरातील तिन्ही हंगामात मक्याचे उत्पादन वाढले आहे. तसेच चालू खरिपातही मक्याची लागवड वाढली आहे. याचा दबाव दरावर येत आहे. तसेच मक्याच्या दरवाढीला मागील २ वर्षांमध्ये इथेनाॅलमुळे चांगलाच आधार मिळाला होता. परंतु यंदा इथेनाॅलसाठी आता तांदूळ आणि उसाचा पर्याय असणार आहे. त्यामुळे मक्याचे दर स्थिरावले आहेत. सध्या मक्याचे दर २ हजार ते २ हजार २०० रुपयांच्या दरम्यान आहेत. पुढील काळात मक्याच्या दरात काहीसे चढ उतार दिसू शकतात. मात्र यंदा मोठी तेजी येण्याची शक्यता कमीच असल्याचे अभ्यासकांनी सांगितले.