Nagpur News : कळमना बाजार समितीमधील कोट्यवधी रुपयांच्या घोटाळ्याची एसआयटीमार्फत चौकशी सुरू असतानाच येथे राष्ट्रीय बाजारतळ स्थापन करण्याचा निर्णय मंत्रिमंडळाने घेतला आहे. त्यामुळे विद्यमान संचालक मंडळ आपसूकच बरखास्त होणार आहे. हा काँग्रेसचे नेते आणि माजी मंत्री सुनील केदार यांना मोठा झटका मानला जात आहे.
पावसाळी अधिवेशनात भाजपचे आमदार कृष्णा खोपडे यांनी बाजार समितीमध्ये झालेल्या घोटाळ्याकडे लक्ष वेधले होते. घोटाळ्याचे दोन अहवाल सादर झाले असतानाही घोटाळेबाजांवर कारवाई केली जात नसल्याचा दावा त्यांनी केला होता. भाजपचे आमदार प्रवीण दटके आणि आशिष जयस्वाल यांनी ही बाजार समिती बरखास्त करण्याची मागणी केली होती.
त्यावर पणनमंत्री जयकुमार रावल यांनी दुसऱ्याच दिवशी नागपूरचे जिल्हाधिकारी यांच्या अध्यक्षतेत एसआयटी समिती जाहीर केली होती. एसआयटीने बाजार समितीच्या कार्यालयाला सील लावताच या विरोधात संचालक मंडळाच्या वतीने उच्च न्यायालयात धाव घेतली होती. न्यायालयाने एसआयटीला बाजार समितीच्या कार्यालयात जाऊन चौकशी करण्यास मनाई केली होती.
दरम्यान, न्यायालयाने ही चौकशी समिती का स्थापन केली, अशी विचारणा करून याचे उत्तर एका आठवड्यास सादर करण्याचे निर्देश दिले आहेत. त्यातच नुकत्याच झालेल्या मंत्रिमंडळाच्या बैठकीतील निर्णयामुळे या बाजार समितीला राष्ट्रीय दर्जा मिळणार आहे. त्यानंतर संचालक मंडळाची नियुक्त करण्याचे अधिकार पणन मंत्र्यांकडे जाणार आहेत. त्यानंतर सभापती, सहनिबंधक दर्जाच्या अधिकाऱ्यास सचिवपदाची नियुक्ती करता येणार आहे.
तसेच प्रशासकीय मंडळावर महसूल विभागातील एक यानुसार शेतकऱ्यांचे सहा प्रतिनिधी असतील व पाच परवानाधारक व्यापारीदेखील असतील. प्रशासकीय मंडळामध्ये कृषी प्रक्रिया संस्थेचा एक, केंद्रीय किंवा राज्य वखार महामंडळासह अधिकृत वखार चालकांचे प्रतिनिधी, सरकारने शिफारस केलेले दोन, राज्यातील शेतकरी प्रतिनिधी अशाप्रकारे बाजार समितीचे प्रशासकीय मंडळ असणार आहे.
बाजार समितीत बदल झाल्यानंतरही एसआयटीमार्फत घोटाळ्याची चौकशी होईल आणि संबंधितांना भ्रष्टाचाराचा हिशेब द्यावा लागेल, असे आमदार कृष्णा खोपडे यांनी सांगितले.
केदार यांचे वर्चस्व संपुष्टात येणार
या फेरबदलामुळे नागपूर जिल्हा सहकारी बँकेच्या पाठोपाठ आता बाजार समितीवरील सुनील केदार यांचे वर्चस्व संपुष्टात येणार आहे. त्या बरोबरच संचालक मंडळ नियुक्त करण्याचे अधिकारही राज्य शासनाकडे जाणार आहेत.
ॲग्रोवनचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.