Pune News : परतीचा प्रवास सुरू असताना राज्यातील वातावरणात बदल होत आहे. काही ठिकाणी अधूनमधून जोरदार पाऊस पडत आहे. कोकणातील ठाणे, रायगड जिल्ह्यांत हलका, तर मध्य महाराष्ट्रातील पुणे, नगर, सोलापूर, सातारा, सांगली जिल्ह्यांत तुरळक ठिकाणी जोरदार पाऊस पडला. गुरुवारी (ता.३) सकाळी आठ वाजेपर्यंत सोलापुरातील मैंदर्गी येथे ६२ मिलिमीटर पाऊस पडल्याची नोंद झाली.

पावसाने उघडीप दिल्यानंतर कडक ऊन पडत आहे. परंतु काही ठिकाणी दुपारनंतर पावसासाठी पोषक वातावरण तयार होत आहे. कोकणातील ठाणे जिल्ह्यातील  टिटवाळा, नडगाव येथे हलक्या सरी पडल्या.

रायगडमधील चौक येथे ३१ मिलिमीटर, बिरवडी २३ मिलिमीटर, तर नेरळ, कळंब, कशेले, लोणेरे, वाकण येथे तुरळक पाऊस झाला. मध्य महाराष्ट्रातील नाशिकमधील वेहेळगाव येथे ३६ मिलिमीटर, तर नडगाव, बनगाव येथे हलक्या सरी पडल्या. पुणे जिल्ह्यात पहाटे धुक्याची स्थिती, तर सकाळपासून ऊन पडत असले तरी दुपारनंतर काही अंशी ढगाळ वातावरण तयार होत आहे. दौंड येथे ४७ मिलिमीटर पाऊस पडल्याची नोंद झाली.  

नगर जिल्ह्यात बेलवंडी येथे ४६ मिलिमीटर, कोळगाव ४१, चिंभळा ३०, टाकळी २७ मिलिमीटर, तर  काष्टी, पेंडगाव, भांबोरा, खर्डा हलका पाऊस झाला. सोलापुरातील वळसंग ३१, सुर्डी ३०, अक्कलकोट २९, दुधनी ४४, मैंदर्गी ६२, वागदरी ३०, दारफळ ३९, म्हैसगाव ४९, जेऊर, उमरड ३८ मिलिमीटर, साताऱ्यातील कुमठे २४, किन्हई ३०, वडूज २९, कुक्‍कुडवाड ४८ मिलिमीटर, सांगलीतील मनेराजुरी ३६, कवठेमहांकाळ ५५, हिंगणगाव ३५, खानदेशातील जळगावमधील अंतुर्ली येथे ३४ मिलिमीटर पाऊस पडला.

मराठवाड्यातील जालन्यातील वाडीगोद्री येथे २७ मिलिमीटर,  बीडमधील दिदरूड येथे हलका पाऊस झाला. परभणीतील गंगाखेड, माखणी, राणीसावरगाव, पिंपळदरी येथे हलका पाऊस बरसला. विदर्भात अकोला, यवतमाळमध्ये तुरळक सरी पडल्या असून अकोल्यातील मूर्तिजापूर येथे हलका, यवतमाळमधील सावर येथे ४९ मिलिमीटर, तर कोपरा, हिवरी येथे सरी पडल्या. त्यामुळे कापूस वेचणी कामात अडथळे येत आहेत.