Jalgaon News : खानदेशात केळीची आवक कमी होत आहे. दुसरीकडे सणासुदीनिमित्त कामगार उपलब्धता कमी झाली आहे. तसेच खरेदीदार केळीची खरेदी टाळत आहेत. यामुळे केळी दरात कुठलीही सुधारणा झालेली नाही.

केळीची कमी दरातील खरेदी सुरूच आहे. केळीला किमान १३०० व कमाल १८०० ते १९०० रुपये प्रतिक्विंटलचा दर मिळत आहे. केळीची आवक खानदेशात सध्या प्रतिदिन सरासरी १२० ट्रक (एक ट्रक १६ टन क्षमता) एवढी आहे.

आवक जळगाव, जामनेर, चोपडा, यावल, पाचोरा, भडगाव या भागांत अधिक आहे. रावेर, मुक्ताईनगरात आवक कमी आहे. चोपडा, जळगाव, जामनेर आदी भागांत दर्जेदार केळी उपलब्ध आहे. यामुळे केळीला या भागात चांगल्या दरांची शेतकऱ्यांना अपेक्षा आहे.

केळीचे दर रावेर व अन्य बाजार समित्या कमाल २००० रुपये प्रतिक्विंटलपर्यंत जाहीर करीत आहेत. परंतु एवढा दर कुठेही शेतकऱ्यांच्या हाती येत नसल्याची स्थिती कायम आहे. मध्य प्रदेशातील बऱ्हाणपूर येथेही केळीचे दर १२०० ते १६५० व कमाल १८०० रुपये प्रतिक्विंटल, असे आहेत. बऱ्हाणपुरातील दरांनुसार खानदेशात केळीची खरेदी केली जात असल्याची माहिती मिळाली.

केळी आवकेत मागील आठवड्यात घट झाली आहे. केळीला उत्तरेकडे मागणी आहे. राजस्थान, पंजाब, हरियाणा, दिल्ली, काश्मिर आदी भागात केळीची पाठवणूक केली जात आहे.