Banana Market : केळी दांड्याचे वजन एक किलो गृहीत धरले जाईना

Jalgaon News : कापूस, सोयाबीनला हमीभाव नसल्याने शेतकरी संतप्त आहेत, असाच संताप, नाराजी केळी उत्पादकांतही आहे. केळीची आवक कमी असतानाही खानदेशात केळीची जाहीर दरांपेक्षा कमी दरात खरेदी केली जात आहे. तसेच केळी घडाच्या दांड्याचे वजन एक किलो गृहीत धरण्याची मागणी दुर्लक्षित आहे.

प्रशासन, शासन निवडणुकीत व्यग्र आहे. बाजार समित्या सुस्त आहेत. व्यापाऱ्यांच्या तालावर बाजार समित्यांचे कामकाज सुरू असल्याचा आरोप शेतकरी करीत आहेत. केळीची सर्वाधिक लागवड असलेल्या जळगावातील रावेर, यावल, मुक्ताईनगर, चोपडा, जळगाव, पाचोरा, भडगाव, चाळीसगाव, धुळ्यातील शिरपूर, नंदुरबारातील शहादा, तळोदा या बाजार समित्या केळी उत्पादकांच्या मागण्यांवर मूग गिळून गप्प आहेत, असा आरोप केळी उत्पादक करीत आहेत.

केळीची खरेदी करताना खरेदीदार घडाच्या दांड्यातून फण्या वेगळ्या करून घेतात. फण्या बॉक्स, क्रेटमध्ये पॅकिंग करून त्यांची वाहतूक केली जाते. केळीचे वजन करताना या दांड्याचे वजन सध्या फक्त ७०० ग्रॅम गृहीत धरले जाते. हे वजन एक किलो गृहीत धरून त्यानुसार शेतकऱ्यांना पैसे किंवा चुकारे दिले जावेत, अशी मागणी अनेक वर्षे आहे.

पण त्यावर जिल्हा प्रशासन, निबंधक कार्यालय, बाजार समित्या, खरेदीदार आदी लक्ष देत नसल्याचा आरोप केळी उत्पादक करीत आहेत. यातच खानदेशात केळीची आवक मागील पाच ते सात दिवसांत सतत कमी झाली आहे. तरीदेखील केळीचे दर खरेदीदार पाडत आहेत. तसेच जे दर जळगावातील रावेर, चोपडा आदी बाजार समित्या जाहीर करतात, त्या दरांनुसार खरेदी केली जात नसल्याची स्थिती खानदेशात असून, याबाबत प्रशासनाने कारवाईसत्र राबविण्याची मागणी शेतकऱ्यांनी केली आहे.

या आहेत अन्य मागण्या...

खरेदीदारांना परवाना आवश्यक असावा व त्यांची अनामत रक्कम बाजार समित्यांनी घ्यावी.

केळीची खानदेशात थेट किंवा शिवार खरेदी केली जात असल्याने या खरेदीसंबंधी निरीक्षण, नियमन यासाठी पथकांची नेमणूक करावी.

थेट शिवार केळी खरेदीवर खरेदीदारांकडून शुल्क आकारणी बंद करावी.

केळीचे जे दर जाहीर होतात, त्याच दरात खरेदी झालेली नसल्यास संबंधित खरेदीदार, एजंट व व्यापारी यांच्यावर कडक कायदेशीर कारवाई करावी.