Jalgaon News: खानदेशात पपई दराचा तिढा या हंगामात अलीकडे तयार झाला आहे. यंदा प्रतिकूल स्थितीमुळे पपई आवक अल्प किंवा कमी राहिली. त्यात कमी दर, वाढत्या उष्णतेमुळे घटलेला उठाव यामुळे अनेकांनी पपई पीक काढले असून, पपईची आवक सध्या कमी किंवा जानेवारी-फेब्रुवारी महिन्यातील आवकेपेक्षा कमी आहे. पपईला जागेवर किंवा शिवार खरेदीत शेतकऱ्यांना प्रति किलो तीन ते चार रुपये दर मिळत आहेत.

किमान दर दोन ते तीन रुपये प्रति किलोचा आहे. शेतकऱ्यांना जागेवर दर सध्या कमी मिळत आहे. त्यात उत्पादन कमी किंवा हवे तसे नाही. यंदाच्या अतिपावसानंतर अतिउष्णतेमुळे हंगामास फटका बसला आहे. परिणामी आवकेवर त्याचा परिणाम दिसत आहे.

पपईचा काढणी हंगाम खानदेशात ऑक्टोबरमध्ये जोमात सुरू होतो. यंदा विषम वातावरण व इतर समस्यांमुळे उत्पादन कमी आहे. रोपांची उपलब्धता यंदा चांगली होती. यात अनेकांनी पपईची लागवड मे महिन्यात किंवा उशिरा केली आहे. यामुळे आवकही कमी होती. दुसरीकडे खरेदीदारांकडून पपईस सध्या मागणी कमी आहे.

कारण पपई उष्ण पीक असून, हिवाळ्यात त्यास अधिक मागणी असते. मार्चनंतर किंवा उन्हाळा सुरू झाल्यानंतर पपईची मागणी कमी होते. त्यात आता पीक किंवा उत्पादन कमी असूनही दर घटले आहेत. सध्या खानदेशात प्रति दिन सहा ट्रक (एक ट्रक १६ टन क्षमता) पपईची आवक होत आहे. ही आवक जानेवारी-फेब्रुवारी महिन्याच्या तुलनेत निम्मीही नाही.

खानदेशातील पपईला उत्तर भारतात मोठी मागणी असते. पण आता उठाव घटला आहे. पपई दरात पुढे आणखी घट होईल, असे संकेत आहेत. कारण उत्तरेकडे ऊन तापू लागले आहे.