Papaya Farming Crisis: पपईखालील मोठे क्षेत्र खानदेशात रिकामे

Jalgaon News: खानदेशात पपई पीक परवडत नसल्याने मोठे क्षेत्र रिकामे झाले आहे. अनेकांनी कमी दर व उष्णतेमुळे मागील महिन्यात क्षेत्र रिकामे केले असून, त्यात अन्य पीक लागवडीचे नियोजन शेतकऱ्यांनी केले आहे.

पपईची खानदेशात सर्वाधिक सुमारे ४५०० हेक्टर एवढी लागवड नंदुरबारमध्ये २०२४-२५ च्या हंगामात झाली होती. त्या पाठोपाठ जळगावात सुमारे १५०० हेक्टरवर आणि धुळ्यात सुमारे एक हजार हेक्टरवर पपईची लागवड होती. मागील वर्षी रोपे वेळेत उपलब्ध न झाल्याने अनेक शेतकऱ्यांची लागवड उशिरा किंवा एप्रिल, मे महिन्यांत झाली. ज्यांनी जानेवारी, फेब्रुवारीत लागवड केली होती, त्या शेतकऱ्यांच्या क्षेत्रातून काढणी ऑक्टोबर, नोव्हेंबरमध्ये सुरू झाली. परंतु उशिरा लागवडीच्या बागांमध्ये डिसेंबरमध्ये काढणी सुरू झाली.

पपईचे दर ऑक्टोबरमध्ये ३५ ते ४० रुपये प्रति किलो, असे शेतकऱ्यांना जागेवर किंवा थेट खरेदीत मिळत होते. नोव्हेंबरमध्ये दर सरासरी २० रुपये प्रति किलो, असे मिळाले. डिसेंबरमध्ये सरासरी दर सहा रुपये प्रति किलो, असे होते. डिसेंबरमध्ये दर १२ रुपये प्रति किलो असे झाले. या महिन्यात प्रति किलो पाच ते सहा रुपये दर शेतकऱ्यांना थेट खरेदीत मिळत आहे.

दर कमी होत असतानाच काही शेतकऱ्यांच्या बागांत रोगराई वाढली. यामुळे उत्पादन घटत असल्याचे दिसत आहे. तर अनेकांना कमी दर व काढणी खरेदीदार करीत नसल्यान्याने फटका बसला. पीक परवडत नसल्याने ते शेतकऱ्यांनी काढून फेकले. त्यात या महिन्यातील उष्णता, कमी दर यामुळे देखील क्षेत्र रिकामे करण्याची कार्यवाही झाली आहे.

तीन हजार हेक्टरवरील पपई पीक काढल्याचा अंदाज

खानदेशात नंदुरबार, धुळे जिल्ह्यात सुमारे दोन हजार हेक्टरवरील पपईचे पीक मार्च व या महिन्यात शेतकऱ्यांनी काढले आहे. त्यात केळी व अन्य पिकांची लागवड करण्याचे नियोजन केले आहे. पपईचे बेवड केळीसाठी अनुकूल असल्याने अनेकांनी मे, जूनमध्ये त्यात केळी लागवडीचे नियोजन केले आहे. जळगाव जिल्ह्यातही काही शेतकऱ्यांनी पीक काढल्याची माहिती आहे.