Nashik News: ‘नाफेड’, ‘एनसीसीएफ’च्या माध्यमातून कांदा खरेदीचे काम देताना घेतली जाणारी टक्केवारी, कांदा खरेदीतील अनियमितता, अवसायनात गेलेल्या सहकारी संस्थांच्या माध्यमातून कांदा खरेदी अशा गंभीर प्रकारांनी कळस गाठला आहे. यामागे दोन्ही संस्थेत परप्रांतीय अधिकारी व राजकीय नेत्यांचा मोठा हस्तक्षेप आहे.
भांडवलदार व व्यापाऱ्यांसाठी आर्थिक देवाणघेवाण होऊन परप्रांतीयांचे मोठे रॅकेट सक्रिय आहे. यात काही सहकारी संस्था व शेतकरी उत्पादक कंपन्यांच्या संचालकांना हाताशी धरून शासकीय तिजोरी लुटण्याचा राजरोस प्रकार सुरू असल्याची खळबळजनक माहिती सूत्रांनी दिली.
राज्य सरकारच्या दक्षता समितीने प्रत्यक्ष खरेदी केंद्रांवर पाहणी केली असता कांदा खरेदी प्रतवारी, गुणवत्ता व पोर्टलवरील खरेदीची माहिती व प्रत्यक्ष खरेदी साठा यात मोठी तफावत आढळून आली आहे. याबाबतचा अहवाल जिल्हा उपनिबंधक फयाज मुलाणी यांनी जिल्हाधिकाऱ्यांकडे सादर केला आहे.
असे असताना खरेदीदार संस्थांच्या स्थानिक शाखा कार्यालयाकडून खरेदी कामकाज लवकर संपवण्याचा घाट घातला जात आहे. तसेच आर्थिक देवाण-घेवाण केल्याशिवाय ‘एनसीसीएफ’मध्ये कांदा खरेदी पोर्टलवर समाविष्ट करत नसून नाहक त्रास दिला जात असल्याचीही कैफियत एका शेतकरी उत्पादक कंपनीच्या संचालकाने बोलताना मांडली.
केंद्र सरकारचे गंभीर प्रकरणाकडे दुर्लक्ष का ?
दोन्ही नोडल एजन्सीला ३ लाख टन कांदा खरेदीचे उद्दिष्ट देण्यात आले आहे. मात्र पहिल्या दिवसापासून खरेदी स्थिती सार्वजनिक माहितीच्या स्वरूपात पुढे आलेली नाही. खरेदी सुरू होण्यापूर्वीच स्थानिक व परप्रांतीय भांडवलदार व्यापारी तसेच राजकीय नेत्यांच्या माध्यमातून शेतकरी उत्पादक कंपन्या व सहकारी संस्थांचा शोध घेऊन काम देण्याची पूर्वयोजना आखली.
त्यानुसार मर्जीतल्या संस्थांनाच काम मिळेल व लहान संस्था व शेतकरी उत्पादक कंपन्या यातून बाहेर जातील, असे नियोजन केले गेले. यात मोठी आर्थिक देवाण-घेवाण झाल्याचा आरोप आहे. यामध्ये राजकीय नेते तसेच अधिकाऱ्यांच्या मर्जीतल्या संस्थांना काम मिळाले असून मोठा गैरव्यवहार होत आहे. या पार्श्‍वभूमीवर ‘ईडी, ‘सीबीआय’कडे मागणी होऊन देखील प्रकरण गांभीर्याने घेतले जात नाही. त्यामुळे यामध्ये मोठे रॅकेट सक्रिय असल्याने संताप व्यक्त करण्यात येत आहे.
सूत्रांनी दिलेली खळबळजनक माहिती :
– ‘नाफेड’ व ‘एनसीसीएफ’मधील अधिकाऱ्यांचे नातेवाईक व संबंधितांची काही संस्थांसोबत खरेदीत भागीदारी
– संस्थांचे अध्यक्ष व संचालक असताना दुसऱ्याच व्यक्तींची खरेदी प्रक्रियेत प्रतिनिधी म्हणून नियुक्ती.
– काही ठिकाणी कंपन्यांचे संचालक प्रत्यक्ष खरेदी प्रक्रियेत; मात्र अप्रत्यक्षपणे परप्रांतीय व्यक्ती व अधिकाऱ्यांचे खरेदी व बँक खात्यावर नियंत्रण
ॲग्रोवनचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.