Jalgaon News: खानदेशात मागील आठ ते १० दिवसांत केळी आवकेत वाढ होत आहे. मध्य प्रदेशातील बऱ्हाणपूर जिल्ह्यातही केळीची आवक वाढली असून, तेथेही मंगळवारी (ता. २२) लिलावात केळीस कमाल २१०० दर मिळाला आहे.

जळगाव जिल्ह्यात आगाप कांदेबाग केळी पिकात आवक वाढत आहे. कांदेबाग केळी पिकासाठी अलीकडे रावेर, मुक्ताईनगरमध्येही आगाप कांदेबाग केळी पीक वाढले आहे. श्रावण महिना, गणेशोत्सव तसेच सणांच्या दिवसात केळीची काढणी होईल,

यासाठी रावेर, मुक्ताईनगरातही केळी लागवड होऊ लागली आहे. केळी लागवड वाढत असून उठावही आहे. मागील सात ते आठ दिवसांत केळी आवक सतत वाढल्याने केळीच्या दरात सुधारणा मात्र झालेली नाही.

केळीची आवक खानदेशात जुलैच्या मध्यापर्यंत प्रतिदिन सरासरी ८० ते ९० ट्रक (एक ट्रक १६ टन क्षमता) एवढी होती. त्या वेळी केळीची दरवाढ सुरू होती. केळीचे कमाल दर २५०० रुपये प्रति क्विंटलपर्यंत पोहोचले होते. परंतु अलीकडे केळी आवक १२५ ट्रकपेक्षा अधिक होत आहे. रावेर, यावल व मुक्ताईनगरातील केळी आवक वाढली आहे. यामुळे केळी दरवाढ थांबली आहे.

मध्य प्रदेशातील बऱ्हाणपुरातही केळी आवक सध्या प्रतिदिन ३३५ ट्रकपर्यंत पोहोचली आहे. तेथे आवकेत मोठी वाढ झाल्याने तेथील लिलावातही केळीला कमाल दर २१०० रुपयांपर्यंत मिळत आहेत. खानदेशात नियमित किंवा हंगामी कांदेबाग केळी पिकात काढणी सुरू झालेली नाही. ही काढणी गणेशोत्सव किंवा पोळा सणाच्या कालावधीत सुरू होईल.