Banana Price: खानदेशात केळीचे दर १४५० ते १८०० रुपयांपर्यंत

Jalgaon News: खानदेशात केळीदरात मागील चार ते पाच दिवसांत एक क्विंटलमागे ३०० ते ४०० रुपयांची घसरण झाली आहे. सध्या कमाल दर १८०० रुपये प्रतिक्विंटल असा आहे. तर किमान दर १४५० ते १७५० रुपये प्रतिक्विंटल असे आहेत.

केळीची गुणवत्ता, दर्जा लक्षात घेऊन केळीला दर दिले जात आहेत. २१५० रुपये दर शेतकऱ्यांना सध्या मिळत आहे. खरेदीदार केळीला उठाव कमी असल्याची बतावणी करून कमी दरात केळीची खरेदी करीत आहेत. याचा फटका खानदेशातील अनेक केळी उत्पादकांना बसत आहे.

केळी आवकेत मागील सात ते आठ दिवसांत कुठलीही वाढ झालेली नाही. परंतु केळी दरात घट झाली आहे. मध्य प्रदेशातील बऱ्हाणपूर येथील बाजारात केळीला लिलावात मात्र दर कमी झाले आहेत. तेथील दरपातळी २१०० रुपये प्रति क्विंटलपर्यंत होती. पण कमाल दर १८०० पर्यंत मिळत आहेत. तेथे केळीची आवक वाढली आहे.

१० ते १६ टन क्षमतेच्या वाहनातून तेथे केळी येत आहे. तेथे सध्या प्रति दिन सरासरी ३०० ट्रक (एक ट्रक १० टन क्षमता) केळीची आवक होत आहे. परंतु दरात तेथे सतत घसरण झाली आहे. बऱ्हाणपुरातील लिलावानुसार केळीची थेट किंवा शिवार खरेदी केली जाते. खानदेशात दर्जेदार, निर्यातक्षम केळी जळगाव, जामनेर, चोपडा, पाचोरा, रावेर, यावल आदी भागांत आहे. धुळ्यातील शिरपूर, नंदुरबारातील विविध भागांतही केळीची आवक घटली आहे.

गणेशोत्सव काळात आवक वाढीची शक्यता

खानदेशात सध्या रोज १७५ ते १८० ट्रक (एक ट्रक १६ टन क्षमता) केळीची आवक होत आहे. आवकेत पुढील आठवड्यात वाढ होईल. कारण अनेक बागांमधील केळी काढणीवर येत आहे. गणेशोत्सवाच्या काळात दर्जेदार केळीची आवक वाढेल.