Banana Export: सातपुड्यातील पंचाळातून केळीची आखाती देशात निर्यात

Buldhana News: बुलडाणा जिल्ह्यात सातपुड्याच्या पायथ्याशी असलेल्या संग्रामपूर तालुक्यातील पंचाळा गावातील केळीची थेट आखाती देशात निर्यात सुरू झाली आहे. सोमवारी (ता. २१) बागेतून पहिली गाडी तोडण्यात आली असून ही केळी इराणला पाठविली जाणार आहे.

संग्रामपूर तालुक्यातील पंचाळा येथील प्रगतिशील शेतकरी अनिल देविदास खानझोड यांनी १५ एकर केळीची बाग लावली आहे. यात त्यांनी उच्च प्रतीच्या केळीचे उत्पादन घेतले आहे. त्यामुळे निर्यातदार थेट बांधावरून येत खरेदी करीत आहेत. ही केळी इराणमध्ये पाठविली जात आहेत.

शेतकऱ्याच्या या यशस्वी निर्यातीच्या पार्श्‍वभूमीवर जिल्हा अधीक्षक कृषी अधिकारी मनोजकुमार ढगे, कृषी उपसंचालक मयूरी खलाणे, खामगाव उपविभागीय कृषी अधिकारी बाळासाहेब व्यवहारे, तहसीलदार प्रशांत पाटील, तालुका कृषी अधिकारी रमेश जाधव, मंडळ कृषी अधिकारी संदीप अवचार व सहायक कृषी अधिकारी रवींद्र जाधव यांनी या बागेला भेट देऊन शेतकऱ्याचे कौतुक केले. केळी उत्पादक शेतकरी संघाचे राज्य सरचिटणीस सचिन कोरडे यांच्या पुढाकाराने या भागातील केळीची यंदा निर्यात होत आहे.

स्थानिक खरेदीदारांकडून अत्यंत कमी दराने खरेदी व्हायची. मात्र आता दर्जेदार केळीची निर्यात होऊन उत्पादकांना चांगले दरही मिळत आहेत. खानझोड यांची केळी जागेवरच १९०० रुपये क्विंटल दराने विक्री झाली. त्यांनी रोजगार हमी योजनेतून ही बाग उभी केली आहे. गेल्या वर्षी १५ एकरात लागवड केली होती.

त्यांनी केळीचे योग्य व्यवस्थापन करीत निर्यातक्षम मालाचे उत्पादन केले. त्यामुळे थेट खरेदीदार बांधावर येऊन केळी खरेदी करू लागले आहेत. यामुळे शेतकऱ्याचा खर्चही वाचत आहे. त्यांना पंचाळा येथील सरपंच अनिल खानझोड, पोलीस पाटील भगवान खानझोड, ज्ञानेश्‍वर देविदास खानझोड, नंदू पाटील खानझोड यांचे विशेष सहकार्य लाभले.

बुलडाणा जिल्हाधिकारी डॉ. किरण पाटील यांनी शेतकऱ्याच्या या यशाबद्दल कौतुक केले. ‘जिल्ह्यातील शेतकरी कष्टाळू व प्रगतिशील आहेत. त्यांना आधुनिक तंत्रज्ञानाची जोड मिळाल्यास उत्पादन व गुणवत्ता वाढते. महात्मा गांधी राष्ट्रीय ग्रामीण रोजगार हमी योजनेतून केळी लागवडीला मिळालेल्या प्रोत्साहनामुळे आज पंचाळा गावातील केळी विदेशात पोहोचत आहेत, ही जिल्ह्यासाठी अभिमानाची बाब आहे,’ असे ते म्हणाले.