Market Bulletin:

हळदीच्या दरात चढ उतार

देशातील बाजारात हळदीच्या भावात मागील काही आठवड्यांपासून चढ उतार सुरु आहेत. हळदीला बाजारात अजून अपेक्षेप्रमाणे उठाव मिळाला नाही. सणांची मागणी अपेक्षेनुसार अजून सुरु झाली नाही. याचा परिणाम दरावर दिसत आहे. निर्यातीची गतीही धिमी आहे. यामुळे दरात काहीसे चढ उतार सुरु आहेत. सध्या हळदीला सरासरी १० हजार ते ११ हजार रुपयांच्या दरम्यान दर मिळत आहेत. हळदीला पुढील काही आठवड्यांमध्ये सणांची मागणी येईल. त्या काळात हळदीला उठाव राहून दरातही काहीशी सुधारणा होऊ शकते, असा अंदाज हळद बाजारातील अभ्यासकांनी व्यक्त केला.

केळीला श्रावणामुळे उठाव

श्रावण महिन्यामुळे केळीला चांगला उठाव मिळत आहे. मात्र बाजारातील आवकही वाढत असल्याचे व्यापारी सांगत आहेत. त्यामुळे केळीच्या दरात अपेक्षित वाढ झाली नाही. तर केळीचे दर दबावातच आहेत. केळीला बाजारात सध्या १४५० ते १७५० रुपये प्रतिक्विंटल असा दर मिळत आहे. केळीची गुणवत्ता, दर्जा लक्षात घेऊन केळीला दर दिले जात आहेत. खरेदीदार केळीला उठाव कमी असल्याची बतावणी करून कमी दरात केळीची खरेदी करीत आहेत. याचा फटका अनेक केळी उत्पादकांना बसत आहे. केळीची आवकही पुढील काही आठवड्यांमध्ये वाढण्याची शक्यता आहे.

गव्हाचे दर स्थिर

गव्हाचा बाजार मागील काही आठवड्यांपासून एका भावपातळीवर स्थिर दिसत आहे. यंदा देशातील उत्पादन वाढल्याचा सरकारचा अंदाज आहे. तसेच सरकारची खरेदी ३०० लाख टनांच्या पुढे गेली. सरकार गव्हाच्या दराविषयी संवेदनशील आहे. दरवाढ रोखण्यासाठी सरकारने स्टाॅक लिमिट लावले आहे. यामुळे दर २ हजार ४०० ते २ हजार ७०० रुपयांच्या दरम्यान सरासरी दर मिळत आहे. काही बाजारातील दर ३ हजारांवरदेखील पोचले आहेत. मात्र बाजारातील आवक आणि मागणी पाहता दर पुढील काही आठवडे याच पातळीदरम्यान राहू शकतात, असा अंदाज गहू बाजारातील अभ्यासकांनी व्यक्त केला.

आले दरात सुधारणा

आले पिकाच्या दरातील घसरणीमुळे शेतकऱ्यांची चिंता वाढली होती. मात्र मागील आठ ते दहा दिवसांपासून दरात सुधारणा होत आहे. आल्याच्या भावात मागील महिन्याच्या तुलनेत १०० ते ३०० रुपयांपर्यंत सुधारणा झाली आहे. सध्या प्रतिक्विंटल २ हजार ५०० ते ३ हजार ५०० रुपयांपर्यंत दर मिळत आहे. पावसामुळे आले पीक काढता येत नसल्याने तुटवडा भासत असल्याने दरात सुधारणा झाल्याचे व्यापारी सांगत आहेत. दर सुधारणेमुळे पुन्हा एकदा आल्याची आवक सुधारत आहे. आल्याला बाजारात मागणीही आहे. मात्र, आवकेचा दबाव मागील दोन महीने आल्याच्या भावावर दिसून आला.

गवार तेजीत

राज्यातील बाजारात गवारचे दर तेजीत आहेत. बाजारातील आवक कमी आणि चांगला उठाव यामुळे दर वाढले आहेत. पावसामुळे गवारची आवक कमीच आहे. राज्यातील बहतांशी भागाता पिकाचे नुकसान झाले आहे. तसेच नव्या लागवडी तोडणीला यायला उशीर आहे. सध्या बाजारात गावरला ६ हजार ते ८ हजार रुपये गुणवत्तेनुसार दर मिळत आहे. राज्यातील केवळ पुणे आणि नागपूर जिल्ह्यातील बाजारांमध्ये आवक १०० क्विंटलपेक्षा आधिक दिसत आहे. इतर बाजारांमधील आवक ५० क्विंटलपेक्षाही कमी आहे. गवार बाजारातील ही स्थिती पुढील काही आठवडे कायम राहू शकते, असा अंदाज गवार बाजारातील अभ्यासकांनी व्यक्त केला.

मका बाजार स्थिरावला

मक्याला देशात चांगली मागणी आहे. मात्र, वाढलेले उत्पादन आणि वाढती आयात यामुळे दरावर दबाव आहे. तसेच ज्या इथेनाॅलमुळे मक्याचे भाव मागील २ वर्षांमध्ये चांगले सुधारले होते. त्या इथेनाॅलसाठी आता तांदळाचा पर्यायही उपलब्ध झाला आहे. त्यामुळे मक्याचे दर एका मर्यादेच्या पुढे सरकले तर मक्याला मागणी कमी होऊन तांदळाला मागणी येऊ शकते. यामुळे दर स्थिर दिसत आहेत. सध्या मका २ हजार १०० ते २ हजार ३०० रुपयांच्या दरम्यान विकला जात आहे. मक्याला देशात चांगली मागणी आहे. मात्र भाववाढीला मर्यादा असल्याचे जाणकार सांगत आहेत.