Market Bulletin:

गव्हाची आवक वाढली

देशातील बाजरात गव्हाची आवक वाढत आहे. त्यामुळे गव्हाच्या भावात काहीशी नरमाई आली. मात्र आजही दव्हाचा भाव हमीभावापेक्षा जास्त दिसत आहे. देशातील महत्वाच्या उपादक राज्यांमध्ये गहू सध्या २ हजार ५०० ते २ हजार ७०० रुपयांच्या दरम्यान विकला जात आहे. दुसरीकडे सरकारची खरेदीही सुरु झाली. सरकारने हमीभाव २ हजार ४२५ रुपये प्रतिक्विंटलने गव्हाची खरेदी सुरु केली. याचा आधार बाजाराला मिळतच आहे. पुढील काळात गव्हाची आवक आणखी वाढण्याचा अंदाज आहे. त्यामुळे गव्हाच्या दरात काहीसे चढ उतार दिसतील, असा अंदाज गहू बाजारातील अभ्यासकांनी व्यक्त केला.

काकडीचा बाजार टिकून

सध्या उन्हाचा चटका वाढल्याने काकडीला चांगली मागणी आहे. दुसरीकडे बाजारातील काकडीची आवक चांगली सुरु आहे. मागणी आणि आवक यामुळे राज्यभरात काकडीचा बाजार टिकून आहे. राज्याच्या वेगवेगळ्या भागात काकडीला सध्या १ हजार १०० ते १ हजार ८०० रुपयांच्या दरम्यान भाव मिळत आहे. काकडीची आवक पुढील काही आठवडे कायम राहील. त्यानंतर आवकेत घट येऊन दरात सुधारणा होऊ शकते, असा अंदाज व्यापारी आणि शेतकऱ्यांनी व्यक्त केला.

कारली टिकून

राज्यातील बाजारात कारल्याची आवक स्थिर आहे. तर दुसरीकडे आल्याला उठाव चांगला आहे. त्यामुळे कारल्याचे भाव टिकून आहेत. कारल्याला सध्या बाजारात सरासरी २ हजार ५०० ते ३ हजार रुपयांच्या दरम्यान भाव मिळत आहेत. कारळ्याची बाजारातील आवक यापुढेही मर्यादीत राहण्याचा अंदाज आहे. तर कारल्याला उठाव चांगला राहील. याचा आधार दराला मिळेल. त्यामुळे कारल्याचे दर आणखी काही आठवडे कायम राहतील, असा अंदाज व्यापारी व्यक्त करत आहेत.  

सोयाबीनमध्ये काहीशी सुधारणा

सोयाबीनला उठाव मिळाल्याने दरात काहीशी सुधारणा दिसून आली. प्रतिक्रिया प्लांट्सनी आज सोयाबीन खरेदीचे भाव सरासरी ४ हजार ३५० ते ४ हजार ५०० रुपयांच्या दरम्यान काढले होते. त्यामुळे बाजार समित्यांमध्येही खरेदी दरात क्विंटलमागे ५० रुपयांपर्यंत सुधारणा दिसून आली. आत सोयाबीन ४ हजार ते ४ हजार १०० रुपयाने विकले गेले. मात्र देशात सोयाबीनचा पुरवठा मुबलक प्रमाणात उपलब्ध आहे. त्यामुळे दरात मोठ्या सुधारणेचे संकेत नाहीत, असे सोयाबीन बाजारातील अभ्यासकांनी सांगितले. 

कापूस दरात सुधारणा

बाजारातील कापसाची आवक घटली आहे.तर दुसरीकडे कापसाला चांगला उठाव आहे. त्यामुळे कापसाच्या भावात सुधारणा दिसून आली. कापसाचे भाव आज अनेक बाजारांमध्ये क्विंटलमागे ५० ते १०० रुपयांनी सुधारले आहेत. बाजारात कापसाला सरासरी ७ हजार १०० ते ७  हजार ५०० रुपयांच्या दरम्यान भाव मिळाला. बाजारातील कापसाची आवक एप्रिल महिन्यात आणखी कमी होण्याची शक्यता आहे. त्यामुळे कापसाच्या दरालाही आधार मिळेल, असे कापूस बाजारातील अभ्यासकांनी सांगितले.