Market Bulletin:

केळी दर नरमले

केळी आवकेत मागील सात ते आठ दिवसांत कुठलीही वाढ झालेली नाही. परंतु केळी दरात घट झाली आहे. केळीदरात मागील चार ते पाच दिवसांत क्विंटलमागे ३०० ते ४०० रुपयांची घसरण झाली आहे. सध्या कमाल दर १८०० रुपये प्रतिक्विंटल असा आहे. तर किमान दर १४५० ते १७५० रुपये प्रतिक्विंटल असे आहेत. केळीची गुणवत्ता, दर्जा लक्षात घेऊन केळीला दर दिले जात आहेत. खरेदीदार केळीला उठाव कमी असल्याची बतावणी करून कमी दरात केळीची खरेदी करीत आहेत. याचा फटका अनेक केळी उत्पादकांना बसत आहे. केळीची आवकही पुढील काही आठवड्यांमध्ये वाढण्याची शक्यता आहे. 

ज्वारीला मागणी कायम

अलीकडच्या काही वर्षांपासून गावरान ज्वारीची मागणी वाढत आहे. मात्र मागणी वाढूनही ज्वारीच्या दरात सुधारणा होत नसल्याची बाजारातील स्थिती आहे. सध्या राज्यात ज्वारी गुणवत्तेनुसार २ हजार ५०० ते ४ हजारांच्या दरम्यान विकली जात आहे. ज्वारी उत्पादनात अहिल्यानगर, धाराशिव, बीड, सोलापूरसह काही जिल्हे आघाडीवर असतात. ज्वारीचे उत्पादन वाढत आहे. मात्र, सध्या बाजारातील आवक कमी आहे. गेल्या काही दिवसांचा विचार करता ज्वारीला मागणी असूनही फारसा दर मिळत नाही. बाजारातही ज्वारीचा दर्जा चांगला असल्याचे सांगत व्यापाऱ्यांकडूनही हमी दरापेक्षा कमी दराने ज्वारीची खरेदी केली जात आहे. ज्वारीचे दर काही आठवडे कायम राहू शकतात, असा अंदाज ज्वारी बाजारातील अभ्यासकांनी व्यक्त केला. 

आले दरात सुधारणा 

आले पिकाच्या दरातील घसरणीमुळे शेतकऱ्यांची चिंता वाढली होती. मात्र मागील आठ ते दहा दिवसांपासून दरात सुधारणा होत आहे. आल्याच्या भावात मागील महिन्याच्या तुलनेत १०० ते ३०० रुपयांपर्यंत सुधारणा झाली आहे. सध्या प्रतिक्विंटल २ हजार ५०० ते ३ हजार ५०० रुपयांपर्यंत दर मिळत आहे. पावसामुळे आले पीक काढता येत नसल्याने तुटवडा भासत असल्याने दरात सुधारणा झाल्याचे व्यापारी सांगत आहेत. दर सुधारणेमुळे पुन्हा एकदा आल्याची आवक सुधारत आहे. आल्याला बाजारात मागणीही आहे. मात्र, आवकेचा दबाव मागील दोन महीने आल्याच्या भावावर दिसून आला. 

कांदा दरपातळी कायम

राज्यातील बाजारात कांद्याची आवक चांगली आहे. त्यामुळे कांद्याचे भाव मागील काही आठवड्यांपासून एका भावपातळीभोवती फिरताना दिसत आहेत. राज्यातील महत्वाच्या नाशिक, पुणे, नगर जिल्ह्यातील बाजाराता आवक चांगली आहे. तर निर्यात अपेक्षेप्रमाणे होत नसल्याचे निर्यातदारांचे म्हणणे आहे. सध्या बाजारात कांद्याला सरासरी १ हजार २०० ते १ हजार ६०० रुपयांचा दर मिळत आहे. कांद्याची बाजारातील आवक आणखी काही आठवडे चांगली राहण्याची शक्यता आहे. तर कांद्याची निर्यातही पुढील काही आठवड्यात सुरु होण्यची शक्यता असल्याचे सांगितले आहे. याचा आधार कांद्याच्या भावाला मिळू शकतो, असा अंदाज कांदा बाजारातील अभ्यासकांनी व्यक्त केला. 

हरभरा दरात सुधारणा

बाजारातील कमी आवक आणि चांगला उठाव यामुळे हरभरा दरात सुधारणा दिसून आली. सणांमुळे हरभऱ्याला मागणी सुधारली आहे. याचा आधार हरभरा दराला मिळाला. सध्या हरभरा ५ हजार ४०० ते ६ हजार रुपयांच्या दरम्यान विकला जात आहे. यापुढील काळात हरभऱ्याला मागणी वाढण्याचा अंदाज आहे. देशात यंदा आयातही वाढली आहे. मात्र, वाढलेल्या मागणीचा दराला आधार मिळत आहे. हरभरा दरातील सुधारणा यामुळे टिकून राहू शकते, असा अंदाज हरभरा बाजारातील अभ्यासकांनी व्यक्त केला.