Jalgaon News : खानदेशात कापसाची आवक कमी आहे. रोज १८ ते २० हजार क्विंटल कापूस बाजारात येत असून, खेडा खरेदी दर नीचांकी स्थितीत आहेत.सध्या सरकीचे दरही कमी आहेत. सरकी दरात सुधारणा झालेली नाही. यामुळे कापसाचे दर खानदेशात दबावातच किंवा अपेक्षित नसल्याची स्थिती आहे.

खेडा खरेदीत कापसाला सध्या प्रतिक्विंटल ६२०० ते ६५०० रुपये प्रतिक्विंटलचा दर मिळत आहे. खानदेशात कापसाची बाजार समित्यांत कुठलीही आवक होत नाही. कमाल कापसाची थेट किंवा खेडा खरेदी केली जाते. खेडा दरात मागील महिनाभरात कुठलीही सुधारणा झालेली नाही. मध्यंतरी कापसाचे दर प्रतिक्विंटल ५५०० ते ६१०० रुपये असे खेडा खरेदीत दिले जात होते.

कापसाची आवक महिनाभरात काहीशी वाढली आहे. २० ते २२ दिवसांपूर्वी खानदेशात रोज १२ ते १५ हजार क्विंटल कापसाची आवक होत होती. त्यात मागील काही दिवसांत वाढ झाली असून, सध्या आवक कमाल २० हजार क्विंटल एवढी आहे. रोज तीन ते चार हजार कापूस गाठींची (एक गाठ १७० किलो रुई) निर्मिती खानदेशात होत आहे.

हमीभाव मिळेना

खानदेशात खेडा खरेदीत यंदा कापसाची हमीभावात खरेदी सुरू नाही. शासनाने हमीभाव कसे मिळतील, याची दक्षता घेतलेली नाही. अलीकडेच कापूस महामंडळाने खरेदी सुरू केली आहे. पण ती खरेदी तोकडी आहे. शेतकऱ्यास खानदेशात खेडा खरेदीत हमीभावाऐवढा दर कापसासंबंधी मिळालेला नाही. यामुळे शेतकऱ्यांत नाराजी व सरकारविषयी रोष आहे.