Cotton Market : कापसाची आवक अल्प; दर नीचांकी स्थितीत

Jalgaon News : खानदेशात कापसाची आवक कमी आहे. एक ते दीड हजार क्विंटल कापूस बाजारात येत असून, खेडा खरेदी दर नीचांकी स्थितीत आहेत.

सध्या खंडीसह (३५६ किलोची एक खंडी) सरकीचे दर घटल्याचे कारण खरेदीदार सांगत आहेत. सरकी दरात सुधारणा झाली, पण ही सुधारणा टिकत नसल्याचे सांगितले जात आहे. यामुळे कापसाचे दर खानदेशात दबावातच किंवा अपेक्षित नसल्याची स्थिती आहे.

खानदेशात कापसाची बाजार समित्यांत कुठलीही आवक होत नाही. कमाल कापसाची थेट किंवा खेडा खरेदी केली जाते. खेडा खरेदीत सध्या दर्जेदार कापसाला ६४०० ते ७००० रुपये प्रतिक्विंटलचा दर मिळत आहे. कमी दर्जाच्या कापसाचे दर खानदेशात ५००० रुपये प्रतिक्विंटल, असे खेडा खरेदीत आहेत.

दरात मागील काही दिवसांत एक हजार रुपयांची घट झाली आहे. कापसाची आवक महिनाभरात वाढण्याचा अंदाज आहे. १५ ते २० दिवसांपूर्वी खानदेशात रोज ४०० ते ५०० क्विंटल कापसाची आवक होत होती. त्यात मागील काही दिवसांत सतत वाढ झाली आहे.