Akola News: स्थानिक कृषी उत्पन्न बाजार समितीत गेल्या काही दिवसांपासून शेतीमालाची आवक व दरांमध्ये स्थिरता दिसून येत आहे.

खरीप हंगाम तोंडावर आला असल्याने शेतकरी आपला शिल्लक शेतीमाल बाजारात विक्रीस आणत असून, सध्या हरभरा सरासरी ५५०० रुपये प्रति क्विंटल तर सोयाबीन ४२५० रुपयांपर्यंत विकले जात आहे. तुरीचा दरही तुलनेत स्थिर आहे.

शेतकऱ्यांनी पावसाळ्यापूर्वी शेती मशागतीसाठी भांडवल उभारण्याचा प्रयत्न सुरू केला आहे. त्यामुळे साठवलेला हरभरा, तूर, सोयाबीन विक्रीस आणून शेतकरी आर्थिक तजवीज करू लागले. बाजार समितीच्या नोंदींनुसार, सोमवारी (ता. ९) सोयाबीन सरासरी ४२५० रुपये क्विंटल विकत आहे.

बाजारात १२१५ क्विंटलची आवक झाली होती. सोयाबीन किमान ४१०० व कमाल ४३३५ पर्यंत विकते आहे. हरभऱ्याचा दर किमान ५००० व कमाल ५६२० रुपये दराने विक्री झाला. १२३५ क्विंटल आवक होती.

तुरीच्या दरात विशेष चढउतार नसून सरासरी ६७३० रुपयांचा दर मिळतो आहे. मात्र, तुरीची सध्याची आवक तुलनेत कमी असून, काही शेतकरी अधिक दराच्या अपेक्षेने तूर साठवून ठेवत असल्याचे दिसून येते.