Pune News: केवळ भारतातच नाही तर अमेरिकेच्या बाजारातही कापसाचे भाव दबावात आहेत. अमेरिकेत भाव कमी होण्याला प्रामुख्याने डाॅलरचे वाढते मूल्य, त्यामुळे निर्यातीसाठी वाढलेले भाव आणि कच्च्या तेलाचे कमी झालेले भाव हे घटक कारणीभूत आहेत. तसेच जागतिक बाजारात सध्या कापसाला अपेक्षित उठाव नाही. त्याचाही दबाव दरावर येत आहे.

अमेरिकेच्या बाजारात कापसाचे भाव दबावात आहेत. मार्च, मे आणि जुलैच्या वायद्यांमधील भावही कमी झाले आहेत. आज दुपारपर्यंत मे महिन्याचे वायदे गेल्या १५ दिवसांच्या निचांकी पातळीवर पोचले होते. वायदे ६६.८५ सेंट प्रतिपाऊंडवर आहेत. अमेरिकेत कापसाचे भाव कमी असल्याने शेतकरी अडचणीत आले आहेत. तसेच ट्रडिंग व्हाॅल्यूमही कमी झाला.

कापसाच्या दरावर दबाव वाढण्याला प्रामुख्याने काही कारणे आहेत. त्यात प्रामुख्याने डाॅलरचे वाढते मूल्य हे एक कारण आहे. डाॅलरचा भाव आपल्या ११ आठवड्यातील किमान दरावरून सुधारला आहे. डाॅलरचा भाव इतर चलनाच्या तुलनेत वाढल्याने म्हणजेच डाॅलर महाग झाल्याने इतर देशांना अमेरिकेतून कापूस खरेदी करताना महाग पडत आहे. अमेरिकेच्या तुलनेत ब्राझील आणि ऑस्ट्रेलियाचा कापूस स्वस्त पडत आहे. त्यामुळे कापसाचे आयातदार अमेरिकेऐजी इतर देशांमधून कापसाची खरेदी करत आहेत.

कापसाच्या भावावर कच्च्या तेलाच्या भावाचाही परिणाम होत आहे. अमेरिकेत तेलाचा स्टाॅक वाढला आहे. यामुळे तेलाची मागणी कमी झाल्याचे स्पष्ट होत. यामुळे कच्च्या तेलाचे भाव कमी होण्यास मदत झाली. तसेच जागतिक पातळीवरील भू-राजकीय समस्यांमुळे तेलाचे भाव कमी झाले आहेत. कच्च्या तेलाचे भाव कमी झाल्यामुळे पाॅलिस्टरचे भाव कमी झाले. पाॅलिस्टर हे कापसाला पर्याय म्हणून कापड निर्मितीसाठी वापरले जाते. पण आता पाॅलिस्टर सव्सत झाल्याने कापसाच्या भावावरही दबाव आला.

अमेरिकेतील कापसाचे भाव सध्या गेल्या पाच वर्षातील निचांकी पातळीवर आहेत. यापुर्वी सप्टेंबर २०२० मध्ये कापसाचे भाव ६७ सेंटच्या खाली आले होते. त्यानंतर सध्या हा भाव मार्केटमध्ये दिसत आहे. पण दुसरीकडे कापसाचा उत्पादन खर्च वाढला. त्यामुळे अमेरिकेतील कापूस उत्पादकांचा उत्पादन खर्चही भरून निघाला नाही. परिणामी अमेरिकेतील शेतकऱ्यांचेही अर्थकारण कोलमडले आहे. त्यामुळे २०२५ मध्ये अमेरिकेतील शेतकरी कापसाची लागवड कमी करतील असा अंदाज अमेरिकेच्या नॅशनल काॅटन काऊंसीलने व्यक्त केला आहे.