थोडक्यात माहिती...

१. सीसीआयने आतापर्यंत ६५ टक्के कापूस विकला असून मागणी वाढल्यामुळे दर ५५ हजारांवरून ५७ हजार रुपये प्रतिखंडी करण्यात आले.

२. कापसाची आवक कमी व व्यापाऱ्यांकडे साठा नाही, त्यामुळे बाजारात सीसीआयच्या साठ्याला मागणी वाढली.

३.देशात यंदा ३११ लाख गाठी कापूस उत्पादनाचा अंदाज, त्यामुळे शिल्लक साठा ८४% ने वाढणार.

Pune News: देशातील कापसाचा सर्वाधिक साठा कॉटन कॉर्पोरेशन ऑफ इंडियाकडे (सीसीआय) आहे. मागील महिन्यात सीसीआयने कापूस विक्रीचे दर कमी केले होते. त्यामुळे व्यापारी आणि उद्योगांनी कापसाची चांगली खरेदी केली. सीसीआयने आतापर्यंत ६५ लाख गाठी कापसाची विक्री केली. सीसीआयने आता कापूस विक्रीचे दर ५५ हजारांवरून ५७ हजार रुपये प्रति खंडीपर्यंत वाढवले आहेत.

जागतिक बाजारातील मंदी आणि देशातील कमी उठाव यामुळे देशातील कापूस उत्पादन कमी राहूनही भाव कमीच होते. खुल्या बाजारात हमीभावापेक्षा कमी दर कापसाला मिळत होता. त्यामुळे शेतकऱ्यांनी यंदा सीसीआयला कापूस विकण्यास पसंती दिली. कापूस बाजारातील समिकरण पाहून यंदा कापसात स्टाॅकिस्ट आले नाहीत. त्यामुळे सर्वाधिक कापसाचा साठा सीसीआयकडे होता. कापूस सीसीआय टप्प्याटप्प्याने बाजारात विकत आहे.

कापसाचा सर्वांत मोठा स्टाॅकिस्ट सीसीआय आहे. मागील काही आठवड्यांमध्ये कापसाला मागणी वाढली. पण बाजारातील कापसाची आवक खूपच कमी आहे. त्यामुळे सीसीआयच्या कापसाला मागणी आली. सीसीआयने यंदा १ कोटी गाठी कापसाची खरेदी केली होती. त्यापैकी ११ जुलैपर्यंत सीसीआयने ६७ लाख गाठी कापूस विकला.

“व्यापाऱ्यांकडे कापसाचा साठा कमी आहे. तसेच बाजारातील आवकही कमी आहे. कापसाची नवी आवक ऑक्टोबरपासून सुरू होईल. त्यामुळे सीसीआयच्या लिलावात पुन्हा विक्री करण्यासाठी व्यापाऱ्यांनी कापूस खरेदी केला,” असे काही व्यापाऱ्यांनी सांगितले.

राजकोट येथील कापूस अभ्यासक आनंद पोपट म्हणाले, “सीसीआयच्या कापसाचे भाव चांगले होते. त्यामुळे भारतीय बाजारात खेरदी वाढली होती. सीसीआयाने आतापर्यंत ६५ टक्के कापूस विकला. गुजरातमध्ये ८५ टक्के विक्री झाली. देशातील अनेक मिल्सनी गरजेपुरता साठा करून ठेवला आहे. तर बाजारातील आवक कमी आहे. देशात जिनिंगही मोठ्या प्रमाणात बंद आहेत. सुतालाही अपेक्षेप्रमाणे मागणी नाही. त्यामुळे मिल्स साठा करण्याबाबत सावध भूमिका घेत आहेत. परिणामी देशात शिल्लक साठा जास्त राहणार आहे.”

सीसीआयने दर वाढविले

सीसीआयने कापूस विक्रीचे दर कमी केल्यानंतर कापसाची खरेदी वाढवली. उद्योग आणि व्यापाऱ्यांनी खरेदी केली. कापसाचा भाव ५५ हजार ते ५५,५०० रुपये प्रतिखंडी होता. मात्र मागणी वाढल्याने सीसीआयने विक्रीचे दर वाढविले आहेत. आता ५७ हजारांच्या दरम्यान कापसाची विक्री करत आहे.

शिल्लक साठा अधिक

काॅटन असोसिएशन ऑफ इंडियाने (सीएआय) नुकत्याच प्रसिद्ध केलेल्या अहवालात देशातील कापूस उत्पादनाचा अंदाज आधीच्या ३०१ लाख गाठींवरून ३११ लाख गाठींपर्यंत वाढवला. त्यामुळे नव्या हंगामात शिल्लक साठा वाढणार आहे. चालू हंगामाच्या सुरुवातीला शिल्लक साठा ३० लाख गाठी होता. नवीन हंगाम सुरू होताना शिल्लक साठा ५५ लाख ५९ हजार गाठी राहण्याचा अंदाज आहे. म्हणजेच गेल्या वर्षीपेक्षा ८४ टक्के जास्त कापूस शिल्लक राहील, असा अंदाज सीएआयने व्यक्त केला.

वारंवार विचारले जाणारे प्रश्न

१. सीसीआयने किती कापूस विकला आहे?
आतापर्यंत ६५ लाख गाठी, म्हणजे सुमारे ६५% साठा विकण्यात आला आहे.

२. कापसाचे सध्याचे दर किती आहेत?
सध्या सीसीआय कापूस ₹५७,००० प्रतिखंडी दराने विकत आहे.

३. गिनिंग युनिट्स का बंद आहेत?

सुताच्या कमी मागणीमुळे अनेक गिनिंग युनिट्स बंद आहेत.

४. देशात कापसाचा शिल्लक साठा किती राहणार आहे?
नव्या हंगामात शिल्लक साठा ५५.५९ लाख गाठींचा अंदाज आहे – ८४% वाढ.

५. कापसाची नवी आवक कधीपासून अपेक्षित आहे?
ऑक्टोबरपासून कापसाची नवी आवक बाजारात येण्याची शक्यता आहे.