Ratnagiri News : वातावरणातील बदलांचे परिणाम समुद्रातील मासळीवर होत आहेत. सध्या बांगडा, कोळंबी मासळी कमी प्रमाणात मिळत असल्याने दर वधारले आहेत. तर ट्रॉलिंगच्या नौकांना मिळणाऱ्या बेबी म्हाकुळ माशाला किलोला १०० ते ११० रुपये दर मिळत आहेत. हा दर पुरेसा नसल्याचे मच्छीमारांकडून सांगितले जात आहे.

ऑगस्ट महिन्यात गिलनेट, ट्रॉलिंगद्वारे तर १ सप्टेंबरपासून पर्ससिननेट जाळीचा वापर करून मासेमारी सुरू झाली आहे. यंदा वादळी वारे, पाऊस अनियमित आहे. खोल समुद्रातील मासा किनाऱ्याकडे येण्यासाठीचे वारे अजूनही वाहू लागलेले नाहीत. त्यामुळे पहिल्या टप्प्यात मिळणारा मासा अपेक्षित जाळ्यात सापडलेला नाही.

श्रावण महिना असल्यामुळे अनेक मच्छीमारी नौका बंदरावरच उभ्या होत्या. तर काही नौका मासेमारीला जात आहेत, परंतु त्यांना अपेक्षित मासे मिळत नाहीत. हंगामाच्या सुरुवातीला मिळणारा बांगडा मासा आता कमी झाला आहे. गिलनेटच्या नौकांना अवघा ३ ते ४ किलो बांगडा मिळत आहे. त्यामुळे मच्छीमारांचा खर्चही वसूल होत नाही. सध्या मासळी बाजारातही बांगड्याचा दर १०० ते १२० रुपये किलो तर टायनी कोळंबी १०० रुपयांवरून १५० रुपये किलोने विकली जात आहे.

ट्रॉलिंगच्या नौकांना बेबी म्हाकुळ मोठ्या प्रमाणात मिळत आहे. एका नौकेला साधारणपणे एक ते दीड टन म्हाकुळ मिळत आहे. परंतु किलोचा दर १०० ते ११० रुपयेच आहे. हा दर ३०० ते ३५० रुपये किलो असणे अपेक्षित आहे. एका फेरीला नौकांना १ ते सव्वा लाख रुपये मिळत आहेत. त्यामधून खर्च वजा जाता अपेक्षित फायदा मिळत नाही.

मिळणाऱ्या मासळीमधून तीन लाखांहून अधिक उत्पन्न अपेक्षित आहे. त्यासाठी मासळी खरेदी करणाऱ्या दलालांवर नियंत्रण ठेवणे आवश्यक आहे, असे मच्छीमार अप्पा वांदरकर यांनी सांगितले. तर गिलनेटने मासेमारी करणारे श्रीदत्त भुते म्हणाले, की किनाऱ्यापासून दोन किमी अंतराच्या परिसरात अपेक्षित मासळी मिळत नाही. त्यामुळे गिलनेटने मासेमारी करणाऱ्यांनी नौका उभ्या करून ठेवल्या आहेत. एका फेरीचा खर्चही हाती येत नाही.