Tokavade News: शेतीची नागंरणी, मशागतीसाठी अनेक वर्षे लाकडी नांगराचा वापर केला जात होता, परंतु आजच्या आधुनिक युगात वेळेची बचत करण्यासाठी यांत्रिकी पद्धतीचा वापर होत असल्याने ग्रामीण भागातून लाकडी नांगर कालबाह्य झाला आहे.

शेतीचे उत्पन्न वाढवण्यासाठी नवनवीन बी-बियाणांचा वापर केला जातो. एसआरटीसारख्या आधुनिक पद्धतीने शेती केली जाते. यामुळे शेतीचे उत्पन्न वाढत असले तरी ग्रामीण भागात परंपरागत वापरत असलेला लाकडी नांगर, लोखंडी फाळाऐवजी ट्रॅक्ट्रर, पॉवर टेलरसारख्या आधुनिक प्रकारच्या यंत्राने घेतला आहे.

तसेच लाकडी नांगर बनविण्यासाठी सागाचे लाकूड मिळत नसल्याने नांगर बनविणे कठीण होत आहे. शिवाय बैलाच्या मदतीने शेतीची मशागतीऐवजी मजुरीमुळे ट्रॅक्टरचा आधार घेतो. त्यामुळे यांत्रिक पद्धतीने जनावरांची संख्या कमी झाली आहे. त्यामुळे कारागिरांना आता काम मिळत नसल्याने वििवध अडचणींचा सामना करावा लागत आहे.

बाजार समितीच्या उत्पन्नात घट

खरीप हंगामात शेतकरी कर्ज काढून नांगराला लागणारे बैल, दुग्ध व्यवसायासाठी गाय, म्हैस विकत घेत होता, परंतु सध्या शेतीची मशागत आधुनिक पद्धतीने होत असल्याने नांगराची जागा ट्रॅक्टर, पॉवर टेलरने घेतली आहे. तसेच जनावरांची खरेदी-विक्री कमी झाल्यामुळे बाजार समितीचे उत्पन्नही घटले असल्याचे दिसत आहे.

कारागिरांच्या उदरनिर्वाहाचा प्रश्‍न

पूर्वी प्रत्येक गावात एकतरी लाकूड काम करणारा कारागीर असायचा. पावसाळा सुरू झाला की ग्रामीण भागात लाकडी नांगराला मोठ्या प्रमाणात मागणी असल्याने दोन महिने तरी चांगली कमाई मिळत असे.

मात्र आता आधुनिकतेच्या काळात ग्रामीण भागातील लाकडी नांगराचा वापर कमी झाला आहे. त्यामुळे नांगराची मागणी घटल्यामुळे ग्रामीण भागातील कारागिरांच्या उदरनिर्वाहाचा प्रश्न निर्माण झाला आहे.