Traditional Farming : पारंपरिक पीकपद्धती बदल करून नगदी पिकांकडे वळण्याची गरज

Ahilyanagar News : शेती अधिक शास्त्रशुद्ध, फायदेशीर व पर्यावरणपूरक बनावी यासाठी शेतकऱ्यांनी पारंपरिक शेती पद्धतीत बदल करून कृत्रिम बुद्धिमत्तेसारख्या आधुनिक तंत्रज्ञानाचा स्वीकार करणे आवश्यक आहे.

शेतीसाठी उपयुक्त माहिती शेतकऱ्यांपर्यंत प्रभावीपणे पोहोचविण्यासाठी कृषी विभागाने कृत्रिम बुद्धिमत्ता तंत्रज्ञानाचा वापर करावा. शेतकऱ्यांनी पारंपरिक पिकाच्या व्यतिरिक्त अधिक उत्पन्न देणाऱ्या नगदी पिकाकडे वळावे असे कृषी विभागाच्या खरीप हंगामपूर्व बैठकीत शेतकऱ्यांना आवाहन करण्यात आले.

अहिल्यानगर येथे जिल्हाधिकारी कार्यालयात खरीप हंगामपूर्व आढावा बैठक पालकमंत्री राधाकृष्ण विखे पाटील यांच्या उपस्थितीत झाली. आमदार अमोल खताळ, विठ्ठलराव लंघे, काशिनाथ दाते, जिल्हाधिकारी डॉ. पंकज आशिया, जिल्हा परिषदेचे मुख्य कार्यकारी अधिकारी आशिष येरेकर, शिर्डीचे अपर जिल्हाधिकारी बाळासाहेब कोळेकर, अहिल्यानगरचे अपर जिल्हाधिकारी शैलेश हिंगे, जिल्हा अधीक्षक कृषी अधिकारी सुधाकर बोराळे आदी उपस्थित होते.

शेतकऱ्यांच्या मागणीनुसार त्यांना निर्भेळ, दर्जेदार व पुरेशा प्रमाणात खते व बी-बियाणे मिळतील याची काळजी घ्यावी. अकोले तालुक्यात भाताचे बियाणे मुबलक प्रमाणात उपलब्ध करून द्यावे. प्रत्येक कृषी केंद्राबाहेर बियाणे व खते यांचा पुरवठा व शिल्लक साठा दर्शविणारा फलक लावावा.

शेतकऱ्यांची फसवणूक करणाऱ्या कृषी केंद्रांवर कठोर कारवाई करावी असे शेतकरी आणि कृषी विभागातील अधिकाऱ्यांना आवाहन करण्यात आले. यावेळी गोपीनाथ मुंडे अपघात सानुग्रह अनुदान.जिल्हा अधीक्षक कृषी अधिकारी सुधाकर बोराळे यांनी खरीप हंगामासाठी कृषी विभागाने केलेले नियोजन व विविध योजनांची अंमलबजावणी याची माहिती दिली.

वन्यजीवाबाबत उपाययोजना राबवा

खरी पूर्व हंगाम आढावा बैठकीत वन्यजीवापासून होणाऱ्या पीक नुकसानीबाबत चर्चा झाली. गोगलगाय, रानडुकर व बिबट्या यासारख्या प्राण्यांपासून पिकांचे संरक्षण करण्यासाठी वनविभागाच्या मदतीने तत्काळ उपाययोजना कराव्यात. शेतकऱ्यांचे वन्यजीवापासून होणारे नुकसान कसे टाळता येईल हे पहावे असे आवाहन या वेळी बैठकीत करण्यात आले.