Jalna News : धान्य गोदाम योजनेअंतर्गत नाबार्डच्या माध्यमातून घेतलेले गोदाम बांधकाम डिसेंबर २०२१ ला पूर्ण झाले त्याचे एकूण १० लाख ४५ हजार अनुदानापैकी ४ लाख १९ हजार अनुदान वर्षभरापूर्वी मिळाले. मात्र अंतिम अनुदान प्राप्तीसाठी बँक आणि नाबार्डकडे पाठपुरावा करण्यापलीकडे एका महिला लाभार्थ्यांच्या पदरात काहीच पडले नसल्याची स्थिती आहे.

यासंदर्भात अधिक माहितीनुसार, जालना जिल्ह्यातील भोकरदन तालुकाअंतर्गत येत असलेल्या धावडा येथील सुनीता पंजाबराव देशमुख यांनी ग्रामीण धान्य गोदाम योजनेअंतर्ग गोदाम बांधण्याचा निर्णय घेतला. ३१ डिसेंबर २०२१ ला बांधकाम पूर्ण झाले. पूर्ण बांधकामाची एका स्थानिक बँकेच्या अधिकाऱ्याकडून १८ एप्रिल २०२४ ला पाहणी करण्यात आली.

वर्षभरापूर्वी धान्य गोदाम योजनेअंतर्गत एकूण १० लाख ४५ हजार अपेक्षित अनुदानापैकी ४ लाख १९ हजार अनुदान मिळाले. परंतु अंतिम अनुदान अजूनही मिळाले नाही. आधी अनेकदा नाबार्ड व बँकेचा पाठपुरावा केला. अलीकडेच सप्टेंबर २०२४ मध्ये पुन्हा एकदा बँकेच्या धावडा शाखेकडे अंतिम अनुदान मिळावे यासाठी लिखित पाठपुरावा केला.

ग्रामीण भागात कृषी आधारित पायाभूत सुविधा उभारण्यामध्ये अंतिम अनुदान मिळण्यात विलंब होत आहे. कोरोना काळात पूर्ण केलेल्या प्रकल्पाचे अनुदान रखडलेला कालावधी लक्षात घेता उर्वरित अनुदान मिळण्यासाठी प्रयत्न व्हावे, अशी विनंती या पाठपुराव्यातून योजनेच्या लाभार्थी सुनीता देशमुख यांनी केली आहे.