Nagar News : नगर जिल्ह्यातील बहुतांश भागात बुधवारी (ता. २४) सायंकाळपासून संततधार पाऊस सुरू आहे. अकोले तालुक्यातील रतनवाडी, पांजरे, घाटघर येथे २४ तासांत विक्रमी पाऊस झाला. अतिपावसामुळे भंडारदरा, मुळा धरणात एका दिवसात प्रत्येकी तब्बल सव्वा टीएमसी पाणी जमा झाले आहे.

गुरुवारी (ता. २५) सकाळी सहा वाजता भंडारदरा ७६ टक्के, तर मुळा ४५ टक्के भरले. ‘मुळा’मध्ये २९ हजार ५०० क्युसेकने पाण्याची आवक होत आहे. निळवंडे ३५ टक्क्याच्या पुढे गेले आहे. दरम्यान, पाण्याची मोठी आवक सुरू असल्याने दुपारी बारा वाजता भंडारदरा धरणातून ८३५ क्युसेकने प्रवरा नदीत विसर्ग सुरू केला आहे.

बुधवारी सायंकाळपासून जिल्हाभर संततधार सुरू आहे. अकोले तालुक्यातील पश्‍चिम भागात मुळा, भंडारदरा, निळवंडे धरणाच्या पाणलोटात तीन दिवसांपासून जोरदार पाऊस सुरू आहे. प्रशासनाकडील नोंदीनुसार घाटघरला ३५५ मिलिमीटर, रतनवाडीला ३२६, पांजरे येथे ३१५, भंडारदरा येथे १८० मिलिमीटर, निळवंडे येथे ८९ मिमी पावसाची नोंद झाली आहे. भंडारदरा आणि मुळा धरणात एका दिवसात तब्बल सव्वा टीएमसी पाणी जमा झाले.

मुळा नदीत बुधवारपासून सुमारे २९ हजार ५०० क्युसेकने पाणी येत आहे. मुळा धरणात गुरुवारी सकाळी सहा वाजता पाणीसाठा ४५ टक्के झाला. भंडारदरा धरण ७६ टक्के भरले. असाच पाऊस राहिला तर चार दिवसांत भंडारदऱ्यातून पाण्याचा विसर्ग करावा लागू शकतो. निवंडेतही अधिक पाणी जमा झाल्याने निळवंडे ३५ टक्क्यांवर भरले आहे. पुण्यातील पावसामुळे सिद्धटेक येथे दौंड पुलाजवळ भीमा नदीतून ४५ हजार ७३० क्युसेकने पाणी उजनी धरणात जात होते.

नांदूर मधमेश्‍वर बंधाऱ्यातून विसर्ग सुरू

नाशिकमधील पावसामुळे नांदूर मधमेश्‍वर बंधाऱ्यातून विसर्ग सुरू केला आहे. गुरुवारी सकाळी ८ हजार ८०८ क्युसेकने पाणी सोडले गेले. दुपारी बारा वाजता भंडारदरा धरणातून ८३५ क्युसेकने प्रवरा नदीत विसर्ग सुरू केला आहे. त्यामुळे नगर जिल्ह्यातील नदीकाठच्या गावांना सतर्कतेचा इशारा दिला आहे. जिल्ह्यातील सर्वच भागात रात्रभर भीज व दमदार पाऊस झाला. पारनेर, वडझिरे या मंडलांत अतिवृष्टीची नोंद झाली.