Parbhani News: शक्तिपीठ महामार्ग शेतकऱ्यांवर लादला जात आहे. त्यामागे मोठे अर्थकारण आहे. त्यात शेतकऱ्यांचा बळी जाणार आहे. शेतकऱ्यांची थडगी बांधून विकासाचे मनोरे उभे करण्यास विरोध आहे. मराठवाडा, विदर्भ, पश्‍चिम महाराष्ट्रातील शेतकऱ्यांचा विरोध असल्यामुळे सरकारला शक्तिपीठ महामार्ग प्रकल्प पुढे रेटणे सोपे नाही, असे स्वाभिमानी शेतकरी संघटनेचे संस्थापक अध्यक्ष माजी खासदार राजू शेट्टी यांनी गुरुवारी (ता. १०) परभणी येथे पत्रकार परिषदेत सांगितले.

राजू शेट्टी म्हणाले, की शक्तिपीठ महामार्ग जात असलेल्या जिल्ह्यांतील शेतकऱ्यांच्या रोष लोकसभा निवडणुकीत उमटला. देवांच्या नावाने जनतेच्या भावनांशी खेळून हा प्रकल्प लादला जात आहे. शेतकऱ्यांची दिशाभूल केली जात आहे. समृद्धी महामार्गाच्या तुलनेत अत्यंत कमी मावेजा शेतकऱ्यांना मिळणार आहे.

सक्तीचे भूसंपादन, सरकार ठरवील ती किंमत, न्यायालयात दाद मागता न येणे अशी चहूबाजूंनी शेतकऱ्यांची कोंडी झाली आहे. या महामार्गाचा शेतकरी आणि ग्रामीण भागाला काहीच फायदा होणार नाही. साधारणतः २८ ते ३० हजार कोटी रुपये खर्च अपेक्षित असताना ८६ हजार कोटी रुपये म्हणजे जवळपास तिप्पट खर्च वाढविण्यात आला.

यामागे आर्थिक लागेबांधे आहेत. पीकविमा योजनेत बदल करून केवळ पीक कापणी प्रयोगाच्या आधारे विमा भरपाई दिल्यास शेतकऱ्यांचे नुकसान होणार आहे. नैसर्गिक आपत्तीमुळे होणाऱ्या पीक नुकसानीची संपूर्ण भरपाई शेतकऱ्यांना मिळाली पाहिजे.

शेतकऱ्यांबाबत सातत्याने बेजबाबदार वक्तव्य करणाऱ्या कृषिमंत्री माणिकराव कोकाटे यांची मंत्रिमंडळातून हाकलपट्टी करावी. अमेरिकेचे राष्ट्राध्यक्ष डोनाल्ड ट्रम्प यांच्या दबावाला बळी पडून शेती मालावरील आयात कर कमी करून अमेरिकेला पायघड्या घातल्या तर देशातील शेती व शेतकरी उद्ध्वस्त होईल. त्यामुळे टेरिफबाबत केंद्र सरकारने ठोस भूमिका घ्यावी, असे शेट्टी यांनी नमूद केले. स्वाभिमानी शेतकरी संघटनेचे जिल्हाध्यक्ष किशोर ढगे, डिंगाबर पवार आदींसह कार्यकर्ते उपस्थित होते.