Sugar Rate India : भारत हा साखरेच्या उत्पादनात जगात सर्वाधिक साखर उत्पादन करणारा देश म्हणून ओळखला जातो. पंरतु यंदा साखरेचे उत्पादन घटण्याची शक्यता साखर तज्ज्ञांकडून व्यक्त केली जात आहे. यंदाच्या गळीत हंगामात १५ जानेवारी २०२४ पर्यंत साखरेचे उत्पादन ५ टक्के घटून १४९.५२ लाख टनांवर आले असल्याची माहिती भारतीय साखर कारखाने महासंघाकडून देण्यात आली आहे.

मागील गळीत हंगामात १५७.८७ लाख टन साखर उत्पादन झाले होते. पंरतु यंदा हे साखरेचे उत्पादन तब्बल ५ टक्क्यांनी घसरल्याने सरकारने याबाबत साखरेवर नियंत्रण ठेवण्याची शक्यता आहे. या पार्श्वभूमीवर यंदा साखरेच्या किमती नियंत्रणात ठेवण्यासाठी सरकार कठोर पावले उचलू शकते, असे सूत्रांनी सांगितले. 'नॅशनल फेडरेशन ऑफ कोऑपरेटिव्ह शुगर फॅक्ट्रीज'ने (एनएफसीएसएफ) गेल्याच आठवड्यात साखर उत्पादनाचे आकडे जारी केले होते.

साठेबाजी रोखणार

मिळालेल्या माहितीनुसार यंदा लोकसभा निवडणुका असल्यामुळे साखरेच्या किमती वाढण्याची शक्यता कमी आहे. यासाठी सरकार कठोर पावले उचलू शकते. कारखाने, साठवण केंद्रे आणि साठेबाजांविरुद्ध सरकारकडून कारवाई केली जाऊ शकते. त्यातून किमती व उपलब्धता नियंत्रणात ठेवण्यात सरकारला मदत मिळू शकेल.

साखर कारखान्यांनी ५८६ कोटींची एफआरपी थकवली

राज्यात तुटून गेलेल्या उसाची एफआरपी रक्कम १३ हजार ६४२ कोटी रुपये होते. यापैकी १३ हजार ५६ कोटीची एफआरपी शेतकऱ्यांच्या खात्यात जमा झाली आहे. तर अद्यापही अनेक साखर कारखान्यांमधील ५८६ कोटींची रक्कम थकीत आहे. दरम्यान थकीत असलेल्या साखर कारखान्यांनी यादी समोर आली नाही.

राज्यातील ८५ कारखान्यांनी ठरलेल्या दराप्रमाणे एफआरपी अदा केली आहे तर ५० कारखान्यांनी ६० ते ७० टक्के रक्कम अदा केली आहे. ११७ कारखान्यांची चालू हंगामातील एफआरपी थकीत आहे. दरम्यान यंदा कारखान्यांकडे ऊसतोड मजुरांटी कमतरता असल्याने कित्येक ठिकाणी उसतोडीसाठी शेतकरी कारखानदारांकडे विनंत्या करत आहेत.