Akola News : यंदाचा उन्हाळा सर्वाधिक तप्त असून नागरिकांसह पशुपक्षी, पिकांसाठीही त्रासदायक झालेला आहे. दररोजचे तापमान आता ४२ ते ४४ अंशादरम्यान राहत आहे. यामुळे वाढलेल्या तापमानाचा भाजीपाला, उन्हाळी पिके तसेच विविध प्रकारची पिके, फळबागांवर परिणाम होत आहे.

पाण्याची सुविधा असल्याने या वर्षी उन्हाळी हंगामात ज्वारी, भुईमूग, मका तसेच भाजीपालावर्गीय पिकांची लागवड शेतकऱ्यांनी केली आहे. हे क्षेत्र अकोल्यात ५ हजार हेक्टरपेक्षा अधिक आहे. याशिवाय हंगामी स्वरूपात कलिंगड लागवड आहे. तसेच केळी, पपई, लिंबू, संत्रा या पिकांच्या बागाही आहेत.

तज्ज्ञांच्या मते तीव्र स्वरूपाच्या उष्ण वातावणामुळे संत्रा, मोसंबी, तसेच इतर लिंबूवर्गीय फळबागांवर आलेली कोवळी नवती करपणे, आंबिया बहराच्या लहान फळांची फळगळ, खोड तडकणे, झाडे निस्तेज दिसणे, नवीन कलमांमध्ये मर होणे असे दुष्परिणाम दिसून येऊ शकतात.

एप्रिलमध्ये लागवड केलेल्या टिश्‍युकल्चर केळी रोपांचे संरक्षण व्हावे यासाठी काही शेतकऱ्यांनी पिकात बोरूची लागवड केल्याचे फायदेही झालेले आहेत.

जमिनीचेही तापमान वाढले

डॉ. पंजाबराव देशमुख कृषी विद्यापीठात जमिनीचे तापमान दैनंदिन स्वरूपात मोजले जाते. हे तापमान जमिनीत तीन स्तरांचे घेतले जाते. यात वरच्या स्तरांपासून ५ सेंटीमिटरच्या आत, नंतर १० आणि १५ सेंटीमिटर अशा स्तरावरील तापमान नोंद घेतली जाते. सध्या मागील आठवड्यापासून हे तापमान वाढलेले आहे. वरील स्तराचे (५ सेंटीमिटर) तापमान ५२ ते ५४ पर्यंत पोचले आहे. १० सेंटीमिटरपर्यंत ४७ ते ४९ आणि १५ सेंटीमिटरवरील तापमान हे ३२ ते ३५ पर्यंत आलेले आहे, अशी माहिती विद्यापीठातील नोंदीवरून स्पष्ट झाले. अकोला जिल्ह्यात यावर्षी तापमान सातत्याने आता ४० अंशावर पोचलेले आहे. बुलडाणा, वाशीम जिल्ह्यातही याच बरोबरीने तापत आहे.

तारीख तापमान कमाल आद्रर्ता

(सकाळ-दुपार) जमिन तापमान (दुपारी ५ सेंमी)

३ मे ४२ ४९-१० ५५.२

४ मे ४३.२ ४०-९ ५६.४

५ मे ४३ ४२-११ ५६

६ मे ४३.२ ४४-१० ५६.५