Kolhapur / Sangli News : कोल्हापूर जिल्ह्यात बहुतांश नद्यांचे पाणी ओसरण्यास सुरवात झाली आहे. शिवारे मोकळी होतील तशी कुजणारी पिके दुर्गंधी आणत आहेत. यामुळे शिवारात फिरणेही मुष्कील बनले आहे. पंधरा दिवस पाणी शेतात राहिल्याने पिकांचे मोठे नुकसान झाले आहे.

दरम्यान, जिल्‍ह्याच्या पश्‍चिम भागात थांबून थांबून पावसाच्या सरी येत असल्या तरी पूर्व भागात मात्र पावसाने पूर्ण विश्रांती घेतली आहे. मंगळवारी (ता.६) विविध धरणांच्या विसर्गात केलेली घट बुधवारी (ता.७) दुपारी चार वाजेपर्यंत कायम होती. आता पंचगंगा नदीचे पाणी इशारा पातळीच्या खाली गेल्याने रस्ते व बंधारे बऱ्यापैकी मोकळे होत आहेत.

पाणी ओसरत असले तरी कोणत्याही नदीचे पाणी अद्यापही पात्रात गेलेले नाही. अनेक शिवारे अजूनही पाण्याखालीच आहेत. पाणी ओसरल्यानंतर कृषी विभागाच्या वतीने पंचनाम्‍यास सुरुवात करण्‍यात आली आहे.

कोयना व वारणा धरणांतून पाणी सोडण्याचे प्रमाण कमी झाल्याने कृष्णा व वारणा नद्यांच्या पाणीपातळीत धीम्या गतीने घट कायम आहे. राधानगरी धरणात ८.३२ टीएमसी पाणीसाठा आहे. बुधवारी सकाळी ७ वाजता राधानगरी धरणाचा स्वयंचलित दरवाजा क्र. ६ खुला असून धरणाच्या विद्युत गृहातून १५०० व सांडव्यातून १४२८ क्युसेक असा एकूण २९२८ क्युसेक पाण्याचा विसर्ग सुरू आहे. विविध नद्यांवरील एकूण ४६ बंधारे अद्यापही पाण्याखाली आहेत.