Nashik News : नाशिक जिल्ह्यात काही बाजार समित्यांमध्ये कांदा लिलाव झाल्यानंतर हिशोबपट्टीतून रोख स्वरूपात हमाली, तोलाई व वाराई कपात केली जात आहे. मात्र त्याचा स्पष्ट उल्लेख पावतीवर नसतो. या मुद्द्यावर शेतकरी किरण मोरे यांनी आवाज उठवला. तर प्रहार संघटनेने सटाणा पोलिसात बेकायदेशीर कपातीबाबत तक्रार दिली. यावर बाजार समितीने आता सटाणा पोलिसात या दोघांविरुद्ध पत्र दिले आहे. संबंधित राजकीय पोळी भाजण्यासाठी व व्यापाऱ्यांना नाहक बदनाम करत असल्याचे नमूद केले आहे.

उमराणे बाजार समितीने आता संबंधितांविरुद्ध सटाणा पोलिसात पत्र दिले आहे. लेव्हीच्या मुद्द्यावर बाजार समिती बंद झाल्यानंतर व्यापाऱ्यांनी हिशेबपट्टीमधून हमाल व तोलाईची रक्कम कपात करणार नाही, असे लेखी पत्र बाजार समितीला दिलेले आहे. त्यामुळे लिलाव ठप्प होते. तर लोकसभा निवडणुकांमुळे आचारसंहिता असल्याने यावर तोडगा निघाला नव्हता. हमाल/मापारी, व्यापारी असोसिएशन व संचालक मंडळाच्या संयुक्त बैठकीत झाली.

त्या वेळी व्यापाऱ्यांनी हिशोबपट्टीत हमाली व तोलाईची रक्कम रोख स्वरूपात कापली जात आहे. यासंबंधी बाजार समितीच्या स्थानिक पातळीवर निर्णय झाला होता. तसा अहवालही बाजार समितीने वरिष्ठ कार्यालयाकडे सादर केलेला आहे. त्यामुळे हा प्रकार चुकीचा नसल्याचे बाजार समितीचे म्हणणे आहे, असे असताना काही घटक बाजार समितीची बदनामी करत असल्याची तक्रारी होत असल्याचे बाजार समिती व्यवस्थापनाचे म्हणणे आहे.

तर शेतकऱ्याच्या हिशेबपट्टीतून कुठलेही कारण न देता कपात झाल्याने यापूर्वी पोलिस स्टेशनमध्ये तक्रार केली होती. या पत्रामुळे व्यापारी असोसिएशनने लिलावात सहभागी न होण्याबाबत पवित्रा घेतला होता. तर लिलाव सुरू झाल्यानंतर शेतकऱ्यांमध्ये असंतोष निर्माण झाला. या वेळी व्यापारी व शेतकरी यांच्या शाब्दिक चकमक झाली होती. त्यामुळे कायदा सुव्यवस्थेचा प्रश्‍न निर्माण होऊ शकतो त्यामुळे बाजार समितीविरुद्ध पत्र देणाऱ्यांना समज देण्यात यावी, अशी मागणी बाजार समितीने केली आहे.