Jalgaon News : कमी कालावधी व बऱ्यापैकी दर देणारे पीक म्हणून खानदेशात यंदा सूर्यफुलाची पेरणी सुमारे १८०० हेक्टरवर झाली आहे. गेले चार-पाच वर्षे अपवाद वगळता पेरणी होत नव्हती. यंदा पेरणी तीन हजार हेक्टरपेक्षा अधिक होईल, असे संकेत आहेत.

कापूस पिकात गुलाबी बोंड अळीने धुमाकूळ घातला. त्यात मका पिकालाही लष्करी अळीने विळखा घातला. मका पीक खर्चिक झाले आहे. तसेच गहू पिकाला अधिकचे पाणी द्यावे लागते. तर बाजरी, कांदा पिकात दरांची शाश्वती नाही. बाजरीला यंदा फक्त १८०० ते २१०० रुपये प्रतिक्विंटलचा दर मिळाला.

अशा स्थितीत धुळ्यातील शिरपूर, जळगावमधील यावल, चोपडा, जामनेर या भागात काही शेतकरी सूर्यफुलाकडे वळले आहेत. सूर्यफूल पेरणीत जळगाव, धुळे जिल्हे १० ते १५ वर्षांपूर्वी आघाडीवर होते. परंतु कमी दर व इतर कारणांमुळे पेरणी कमी झाली. मध्यंतरी सूर्यफूल पेरणीची नोंदही नव्हती.

परंतु अलीकडे आलेले चांगले वाण, दरांची हमी, सिंचनाची गहू, मक्याच्या तुलनेत कमी गरज व कमी खर्च यामुळे सूर्यफूल पेरणीला बरा प्रतिसाद दिसत आहे. पेरणी धुळ्यातील शिरपुरमध्ये २०० हेक्टरवर आहे.

तसेच जळगावमधील चोपडा, यावल, जामनेरात मिळून १५०० हेक्टर क्षेत्र आहे. इतर भागांतही पेरणी झाली आहे. अनेक शेतकऱ्यांनी आगाप पेरणी केली. मळणीनंतर ओल्या सूर्यफूल पिकास १० हजार रुपये दर मिळण्याची स्थिती सध्या आहे. एकरी किमान ४० ते ४५ हजार रुपये नफा सुटेल, असे चित्र सध्या आहे, असे जाणकारांचे म्हणणे आहे.