Amravati News : विधानसभेच्या निवडणुका डोळ्यांसमोर ठेवत शेतकऱ्यांचा रोष कमी करण्यासाठी रब्बी हंगामातील नुकसानग्रस्त शेतकऱ्यांना अनुदान वितरित करण्याचा निर्णय राज्य सरकारने घेतला आहे.

या अनुदानात मे महिन्यातील बाधित शेतकऱ्यांचा समावेश नसून जानेवारी ते एप्रिल या कालावधीत अवकाळी पावसाने नुकसान झालेल्या शेतकऱ्यांना हे अनुदान मिळणार आहे. यामुळे जिल्ह्यातील प्रतीक्षेतील ७४ हजार ३९२ शेतकऱ्यांना अनुदान मिळणार आहे. त्यांच्यासाठी १६६ कोटी ६४ लाख रुपयांची तरतूद करण्यात आली आहे.

जानेवारी ते मे या कालावधीत अवकाळी पावसाने शेतीपिकांचे जिल्ह्यात मोठे नुकसान झाले आहे. ४९ हजार ३६७ हेक्टर क्षेत्रातील पिकांची नासाडी होऊन शेतकऱ्यांच्या हातातील पीक गेले होते. जिल्हा प्रशासनाने या नुकसानीचा संयुक्त अहवाल विभागीय आयुक्तांमार्फत शासनाला पाठविला होता.

मात्र अनुदानाची घोषणा होत नसल्याने नवीन खरीप हंगाम सुरू झाला तरी शेतकरी अनुदानापासून वंचित होते. त्यामुळे शेतकऱ्यांमध्ये रोष व्याप्त होता. दरम्यान मदत व पुनर्वसन मंत्री अनिल पाटील यांनी राज्यातील चार महसूल विभागातील नुकसानग्रस्त शेतकऱ्यांना ५९६ कोटी २१ लाख रुपयांचे अनुदान वितरित करण्यात येत असल्याचे घोषित केल्याने हा प्रश्न मार्गी लागला आहे.

नाशिक, पुणे, अमरावती व नागपूर या चार महसूल विभागांसाठी ५९६ कोटी २१ लाख रुपयांचे अनुदान वितरित करण्यास मंजुरी देण्यात आली आहे. यामध्ये अमरावती जिल्ह्यासाठी १६७ कोटी ८३ लाख रुपयांचा समावेश आहे. तर, उर्वरित अकोला, यवतमाळ, बुलडाणा व वाशीम जिल्ह्यांसाठी ११४ कोटी २९ लाख रुपयांची तरतूद आहे.

मे मधील नुकसानीचा उल्लेख नाही

मे २०२४ मधे अवकाळी पावसाने जिल्ह्यातील मोर्शी, भातकुली, नांदगाव खंडेश्वर, चिखलदरा, अंजनगावसुर्जी व तिवसा या तालुक्यांत ३७१ हेक्टर क्षेत्रातील पिकांचे नुकसान झाले आहे. त्याचा संयुक्त अहवाल पाठविण्यात आला असून १ कोटी १९ लाख रुपये अनुदानाची मागणी जिल्हा प्रशासनाने नोंदविली होती. तथापि जाहीर झालेल्या अनुदानात मे महिन्यातील नुकसानीचा उल्लेख नसल्याने ९३४ शेतकऱ्यांना प्रतीक्षा कायमच आहे.