Satara News : पावसाअभावी सोयाबीनचे उत्पादन निम्म्यावर येऊन पिकाला अस्मानी संकटाचा फटका बसला. हाताशी मिळेल तेवढे सोयाबीन काढून बाजारात विक्रीसाठी आणले तर त्याच्या खरेदीसाठी हमीभावाची केंद्रेच सुरू नाहीत. त्यामुळे नाइलाजाने शेतकऱ्यांना व्यापाऱ्यांकडे सोयाबीन घालण्याशिवाय पर्याय नाही.

सोयाबीनची किमान आधारभूत किंमत ४ हजार ६०० असली तरी अनेक सातारा जिल्ह्यातील अनेक व्यापाऱ्यांकडून चार हजार २०० ते चार हजार ३०० रुपयांपर्यंत त्याची खरेदी केली जाते. त्यात ओलसरपणा बघून दर कमी केला जातो आहे. त्यामुळे यंदा संकटात बळीराजा चितपट झाला आहे.

खरीप हंगामात सातारा जिल्ह्यात सर्वाधिक ८५ हजार हेक्टरवर सोयाबीनची पेरणी झाली. शेतकऱ्यांनी सोयाबीन काढून बाजारपेठेत विक्रीसाठी आणले आहे. त्यांच्याकडे काढलेले सोयाबीन ठेवायची व्यवस्था नसल्याने त्यांनी काढून लगेच विक्रीस आणले. मिळेल त्या दराने त्याची विक्री करून मिळेल तेवढे पैसे घेतले.

('ॲग्रोवन'चं व्हॉट्सअ‍ॅप चॅनल जॉईन करण्यासाठी येथे क्लिक करा)

काही व्यापाऱ्यांनीही किमान आधारभूत किमतीचा विचारच न करता वाट्टेल त्या दराने खरेदी सुरू ठेवली आहे. बाजारपेठेत उतारा बघून ४२०० ते ४४०० रुपये भाव दिला जात आहे. पणन विभागाने हमीभावाने खरेदी केंद्रेही सुरू केली नाहीत. त्यामुळे शेतकऱ्यांनाही व्यापाऱ्यांकडे सोयाबीन घालण्याशिवाय पर्याय नाही.

क्विंटलला २०० ते ४०० रुपयांचा फटका बसत असल्याने शेतकऱ्यांचे कोट्यवधी रुपयांचे नुकसान होत आहे. हमीभावापेक्षा कमी दराने खरेदी होत असतानाही त्यावर नियंत्रण ठेवणारी यंत्रणा मात्र मूग गिळून गप्प आहे.

शेतकऱ्यांचा खर्चही निघेना

शेतकऱ्यांनी कर्ज काढून सोयाबीनची पेरणी केली. महागडी खते टाकून पिके घेतली. ती पिके काढायला १५० रुपये गुंठ्याने मजूर पैसे घेत आहेत. त्यातच मळणी करायला ३५० ते ४०० रुपये पोत्याला घेतले जात आहेत.

घाम गाळून पिकवलेले सोयाबीन सरकारची खरेदी केंद्रे सुरू नसल्याने कमी दराने विक्री करावी लागत आहे. त्यातून काही व्यापाऱ्यांनी आपले उखळ पांढरे करून घेतले आहे. मात्र शेतकऱ्यांना क्विंटलला सुमारे २०० ते ३०० रुपयांचा तोटा सोसावा लागत आहे. त्यामुळे त्यांचा खर्चही निघत नसल्याची स्थिती आहे.