अकोला ः परतीच्या पावसाने सोयाबीन हंगामाची दाणादाण उडविली आहे. अधून-मधून येत असलेल्या पावसामुळे आता सोयाबीन सोंगणी व मळणीच्या कामात अडथळे तयार होत आहेत. मागील २४ तासांत जिल्ह्यात बाळापूर, तेल्हारा तालुक्यात दमदार पावसाची नोंद झाली. अद्यापही पावसाचे वातावरण आहे.
शुक्रवारी (ता.१६) बाळापूर तालुक्यात १६.३, तर तेल्हारामध्ये १२.३ मिलिमीटर पाऊस झाला. या आठवड्यात बऱ्याचवेळा पावसाने हजेरी लावली. सध्या सोयाबीन सोंगणी, मळणीचे कामे जोमाने सुरु आहेत. यंदाच्या मोसमात आधी मूग, उडदाचे पीक फारसे आले नाही. त्यानंतर शेतकऱ्यांच्या नजरा सोयाबीन या प्रमुख पिकावर होत्या.
सोयाबीन काढणी सुरु होत असतानाच पावसाने ठाण मांडले. काही ठिकाणी सोयाबीनची सोंगणी, मळणीचे काम जोरावर आले होते. त्यातच पावसाने हजेरी लावल्याने पीक ओले झाले. त्यामुळे सोंगणीचे, मळणीचे काम ठप्प झाले.
सोयाबीनची झडती यंदा दरवर्षीच्या तुलनेने कमी आहे. पीक चांगले दिसूनही त्याला लागलेल्या शेंगांमध्ये पुरेशा प्रमाणात दाणे भरले नव्हते. परिणामी, सोयाबीनचे उत्पादन एकरी सरासरी तीन ते सहा क्विंटल आहे. एवढ्या उत्पादनात शेतकऱ्यांचा खर्चही निघण्याची चिन्हे नाहीत.
खोडकीडीमुळे तेल्हारा तालुक्यात अनेकांनी सोयाबीन पिकावर ट्रॅक्टरही फिरवलेला आहे. काही दिवसांपूर्वीच गाडेगाव येथे शेतकरी समाधान साबळे आणि गजानन साबळे यांनी आपल्या सात एकर सोयाबीनच्या उभ्या पिकावर रोटाव्हेटर चालवून पीक उपटून फेकले. काहींनी त्या पिकात जनावरे सोडली होती.
ॲग्रोवनचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.