Nanded News : लोहा तालुक्यातील जोमेगाव येथील रेशीमशेती करणाऱ्या १४ शेतकऱ्यांनी १३.७१ क्विंटल रेशीमकोष विक्री करून तब्बल आठ लाख ६५ हजार रुपये मिळवले. यातून आर्थिक टंचाईच्या काळात घरखर्च, शेतीखर्च आणि इतर गरजांसाठी रोख पैसा उपलब्ध झाल्याने शेतकरी सुखावले आहेत. रेशीमशेती संकटातही आर्थिक आधार देते, असे शेतकऱ्यांचे मत आहे.

महारेशीम अभियानांतर्गत एमआरजीएस तसेच ‘सिल्क समग्र दोन’ योजनेच्या साहाय्याने जोमेगाव येथील ३० शेतकऱ्यांनी तुतीची लागवड केली आहे. मागील दोन वर्षांपासून हे शेतकरी रेशीम कोष उत्पादनात यश मिळवत असून, यंदाही चांगले उत्पन्न मिळाले आहे. मागील मे महिन्यांत तुतीची छाटणी करून दीड महिन्यानंतर शेतकऱ्यांनी रेशीम कोष संगोपनास सुरुवात केली. सुमारे २२ ते २८ दिवसांत उत्कृष्ट दर्जाचे कोष तयार झाले.

विक्रीसाठी बीड येथील छत्रपती शिवाजी महाराज कृषी उत्पन्न बाजार समिती तसेच कर्नाटकातील रामनगरम बाजारात हे कोष नेण्यात आले. एकूण १४ शेतकऱ्यांनी १३.७१ क्विंटल कोष विकले. या साठी प्रतिक्विंटल कमाल दर ६५ हजार रुपये, किमान ५९ हजार पाचशे रुपये आणि सरासरी ६३ हजार रुपये असा दर मिळाला.

या विक्रीतून शेतकऱ्यांच्या हाती आठ लाख ६५ हजार रुपये आले आहेत. ऐन टंचाईच्या काळात शेतकऱ्यांना रेशीम शेतीतून मोठा दिलासा मिळाला आहे. रेशीमशेतीचे कमी कालावधीतील उत्पादन, बाजारातील मागणी व तुलनेने स्थिर दर यामुळे अनेक शेतकरी आता या व्यवसायाकडे वळत असून, खरिपातील आर्थिक तुटवडा भरून काढण्यासाठी रेशीमशेती एक पर्याय ठरत आहे. वर्षभर चालणाऱ्या रेशीम शेतीतून गावातील अनेक महिला, पुरुषांना रोजगार उपलब्ध होत आहे.

शेतकरी निहाय उत्पन्न (रुपये)

दाजीराव दिगंबर शिंदे : २,२०,०००, माधवराव काळबा शिंदे : २५,०००, दशरथ किशन शिंदे : ४०,०००, विनोद मधुकर शिंदे : ७०,०००, बालाजी माधवराव शिंदे : ७०,०००, मारुती संभाजी शिंदे : ६७,०००, विठ्ठल मारुती शिंदे (देशाई) : १,१०,०००, अविनाश अच्युत शिंदे : ३२,०००, विश्‍वास कोंडिबा गव्हाणे : ७४,०००, रामेश्वर पांडुरंग शिंदे : ५६,०००, शंकुतला मारोती पांचाळ : ५०,०००, देविदास दिगंबर शिंदे : ६९,०००, नंदाबाई परसराम कापसे : ३३,०००, गोपीराव प्रभाकर शिंदे : २३,०००.