Kolhapur Shaktipeeth Highway : कोल्हापूर जिल्ह्यात शक्तीपीठ महामार्गाविरोधात आंदोलन सुरू आहे. दरम्यान एकोंडी (ता. कागल) येथे शक्तिपीठ महामार्गबाधित शेतकऱ्यांनी पालकमंत्री हसन मुश्रीफ यांच्या वाहनांचा ताफा अडवला.

विधानसभा निवडणुकीच्या आचारसंहितेआधी शक्तिपीठ महामार्ग रद्दची अधिसूचना का निघाली नाही? याचा जाब शेतकऱ्यांनी विचारला. तसेच शक्तिपीठ महामार्ग करायचा असेल तर करा आणि आमचे पंढरपूरकडे स्थलांतर करा, अशा उद्विग्न भावना त्यांनी गुरुवारी (ता. १७) व्यक्त केल्या.

पालकमंत्री मुश्रीफ एकोंडी येथे कार्यकर्त्यांची बैठक संपवून बामणी येथील भाजपच्या मेळाव्याकडे निघाले होते. त्यावेळी सिद्धनेर्ली ते एकोंडी मार्गावर हे शेतकरी ठिय्या मांडून बसले होते. मुश्रीफ यांनी कोल्हापूर वगळून शक्तिपीठ महामार्ग रद्दची अधिसूचना न निघाल्यास मी राजीनामा देईन, असे सांगितले.

शेतकऱ्यांनी या ठिकाणी शक्तिपीठ महामार्गाचे झालेले चिन्हांकन दाखवले. त्यावर मुश्रीफ यांनी शक्तिपीठ महामार्ग मला तोंडपाठ आहे. कोणत्याही परिस्थितीत तो होऊ देणार नाही, अशी ग्वाही दिली. 

यावेळी आनंदा पाटील, विष्णू वैराट, दिनकर लोंढे, सुभान वैराट, यशवंत मर्दाने, बाळासो लोंढे, संतोष लोंढे, यशवंत सुळगावे, विष्णू सुळगावे, पांडुरंग पाटोळे उपस्थित होते.