Satara News : गतवर्षी जिल्हा वार्षिक योजनेच्या माध्यमातून राज्यातील ३६ जिल्ह्यांमध्ये १८ हजार कोटी रुपयांचा निधी वितरित करण्यात आला होता. या वर्षी हा निधी वाढवून २० हजार कोटी रुपये करण्यात येणार आहे. त्यामुळे वाढीव निधीच्या प्रमाणात प्रत्येक जिल्ह्याला जिल्हा वार्षिक योजनेअंतर्गत निधी वाढवून देण्यात येईल.

सातारा जिल्ह्याने २३८.७५ कोटींची अतिरिक्त मागणी केली असून, त्यानुसार निधी वाढवून दिला जाईल. हा सर्व निधी विहित मुदतीत, गुणवत्तापूर्ण कामांवर खर्च होईल, याची दक्षता सर्व यंत्रणांनी घ्यावी, अशी सूचना उपमुख्यमंत्री आणि वित्त व नियोजनमंत्री अजित पवार यांनी केली.

जिल्हा वार्षिक योजना सर्वसाधारण सन २०२५-२६ चा पुणे, सातारा, सोलापूर, सांगली, कोल्हापूर या पाच जिल्ह्यांचा प्रारूप आराखडा अंतिम करण्यासाठीची राज्यस्तरीय बैठक उपमुख्यमंत्री आणि वित्त व नियोजनमंत्री अजित पवार यांच्या अध्यक्षतेखाली विभागीय आयुक्त कार्यालय पुणे येथे झाली.

या वेळी साताऱ्याचे पालकमंत्री तथा वन व पर्यटन मंत्री शंभूराज देसाई, सार्वजनिक बांधकाममंत्री शिवेंद्रसिंहराजे भोसले, ग्रामविकासमंत्री जयकुमार गोरे, मदत व पुनर्वसनमंत्री मकरंद जाधव पाटील, कृष्णा खोरे महामंडळाचे उपाध्यक्ष आमदार महेश शिंदे, विभागीय आयुक्त डॉ. चंद्रकांत पुलकुंडवार, वित्त व नियोजन विभागाचे अतिरिक्त मुख्य सचिव डॉ. राजगोपाल देवरा, जिल्हा परिषदेच्या मुख्य कार्यकारी अधिकारी याशनी नागराजन उपस्थित होते. जिल्ह्याच्या स्थानिक गरजेनुसार कार्यान्वित यंत्रणांकडून निधी मागणी करण्यात आली आहे. जिल्ह्याच्या आवश्यकतेनुसार निधी मंजुरीस उपमुख्यमंत्री अजित पवार यांनी मान्यता दिली.

सातारा जिल्ह्यात राबविण्यात येत असलेल्या नावीन्यपूर्ण उपक्रमांची संकल्पना त्यांनी जाणून घेतल्या. यामध्ये महाबळेश्‍वर तालुक्यातील पाचगणी येथे बचत गटांच्या उत्पादित वस्तूंना कायमस्वरूपी बाजारपेठ उपलब्ध व्हावी, यासाठी मानिनी हा स्वतंत्र व प्रशस्त मॉल उभारण्यात येत आहे, या संकल्पनेचे कौतुक केले. अन्यत्रही ही संकल्पना राबवावी, असे त्यांनी सांगितले.

या वेळी त्यांनी माण, खटाव, फलटणचा काही भाग उजाड आहे, अशा ठिकाणी जिल्हा प्रशासनाने सौरऊर्जा प्रकल्प उभारावेत. त्यामुळे वीजबिलात मोठी कपात होईल, असे सांगितले. जिल्ह्यात प्रस्तावित असलेल्या महत्त्वाकांक्षी प्रकल्पांची त्यांनी माहिती घेतली.

यामध्ये कृषी पर्यटनामध्ये थीम आधारित गावे विकसित करणे, कृत्रिम बुद्धिमत्ता तंत्रज्ञानासह निर्यातक्षम फळबाग उत्पादन प्रकल्प, नावीन्यपूर्ण योजनेंतर्गत शेतकऱ्यांच्या डे केअर केमोथेरपी युनिट, महिला केंद्रित कर्करोग अभियान आदी उपक्रमाबद्दल जिल्हाधिकारी संतोष पाटील यांनी माहिती दिली.

अतिरिक्त निधीची मागणी...

सातारा जिल्ह्याचा नियोजन आराखडा ४८६ कोटी २५ लाखांचा असून, अतिरिक्त मागणी २३८ कोटी ७५ लाखांची आहे. पुणे विभागातील जिल्ह्यांचा नियोजन आराखडा ३१८९ कोटी १२ लाखांचा असून, १७७८ कोटी २२ लाखांची अतिरिक्त मागणी आहे. या सर्व मागणीचा सविस्तर आढावा घेऊन भरीव निधीची तरतूद करण्यात येईल, असे त्यांनी सांगितले.