Ashta, Sangli News: पद्मभूषण क्रांतिवीर डॉ. नागनाथअण्णा नायकवडी हुतात्मा किसन अहिर साखर कारखान्याच्या गळीत हंगाम २०२५-२६ करिता अध्यक्ष वैभव नायकवडी यांच्या हस्ते रोलर पूजन झाले.

वैभव नायकवडी म्हणाले, ‘‘येणारा गळीत हंगाम पूर्ण क्षमतेने व यशस्वी पार पाडण्यासाठी कारखान्याचे सर्व अधिकारी, कर्मचाऱ्यांनी प्रयत्न करावा. ऑफ सिझन मेंटेनन्सची कामे प्रगतिपथावर आहेत.

येणाऱ्या गळीत हंगामामध्ये अडचणी, स्टॉपेजेस येऊ नयेत, त्यादृष्टीने ऑफ सिझनचे काम करावे. गळिताचे दर जादा राहण्याच्या दृष्टीने योग्य नियोजन करावे. शेती खात्याने त्यांच्या ऊस नोंदी पूर्ण केल्या आहेत.

यंदा गळीत हंगाम यशस्वी करण्यासाठी संपूर्ण ऊस तोडणी वाहतूक यंत्रणा उपस्थित राहण्याकरिता खबरदारी घ्यावी. उसाचा दर व साखरेला मिळत असलेली किंमत यातील तफावतीमुळे कारखान्यांना अपुरा दुरावा निर्माण होऊन आर्थिक अडचणी येऊन ऊस बिले व तोडणी वाहतुकीची बिले व अन्य खर्च भागविणे कारखान्यांना जिकिरीचे होत आहे.

साखरेच्या ‘एमएसपी’त वाढ झाल्यास साखर उद्योगासमोरील आर्थिक अडचणी संपण्यास मदत होईल.’’या वेळी उपाध्यक्ष रामचंद्र भाडळकर, गौरव नायकवडी यांच्यासह संचालक, शेतकरी, पदाधिकारी, अधिकारी, कर्मचारी उपस्थित होते.