Mumbai News: राज्याच्या मुख्य सचिवपदी ज्येष्ठ सनदी अधिकारी राजेश कुमार यांची नियुक्ती झाली असून त्यांनी सोमवारी (ता. ३०) मावळत्या मुख्य सचिव सुजाता सौनिक यांच्याकडून पदभार स्वीकारला.

या वेळी मंत्रालयातील अनेक सनदी अधिकाऱ्यांनी राजेश कुमार यांची भेट घेऊन त्यांचे अभिनंदन केले. मुख्य सचिवपदी नियुक्त झालेले राजेश कुमार ४९ वे सनदी अधिकारी आहेत.

पहिल्या महिला मुख्य सचिव होण्याचा मान मिळालेल्या सुजाता सौनिक आज नियत वयोमानानुसार सेवानिवृत्त झाल्या. सौनिक यांच्या काळात मंत्रालयातील प्रवेशासाठी आणलेली प्रणाली विशेष चर्चेत राहिली.

सौनिक यांच्या जागी महसूल विभागाचे अतिरिक्त मुख्य सचिव राजेशकुमार यांची नियुक्ती केली आहे. राजेश कुमार हे १९८८ च्या तुकडीचे सनदी अधिकारी आहेत. पुढील दोन महिन्यांत म्हणजे ऑगस्ट २०२५ मध्ये ते सेवानिवृत्त होणार आहेत.

त्यामुळे मुख्य सचिव म्हणून काम करण्यास राजेश कुमार यांना जेमतेम दोन महिन्यांचा कालावधी मिळणार आहे. दरम्यान, राज्य सरकारने पुढील आदेश होईपर्यंत महसूल विभागाच्या अतिरिक्त मुख्य सचिवपदाचा अतिरिक्त कार्यभार राजेश कुमार यांच्याकडेच कायम ठेवला आहे.