Solapur News : सोलापूर जिल्हा मध्यवर्ती सहकारी बॅंकेच्या बेकायदा कर्जवाटप प्रकरणी सहकारमंत्री आणि न्यायालयात लढाई लढणारे बार्शीचे माजी आमदार राजेंद्र राऊत यांनी जिल्ह्यातील कथित साखर घोटाळ्याप्रकरणी थेट सक्तवसुली संचालनयाकडे (ईडी) तक्रार केली आहे. या प्रकरणात ईडीने कारवाई न केल्यास आपण उच्च न्यायालयात जाणार, असल्याची माहितीही माजी आमदार राऊत यांनी दिली आहे.

सोलापूर जिल्ह्यातील तीन साखर कारखान्याच्या विरोधात साखर घोटाळ्याविरोधात बार्शीचे माजी आमदार राऊत यांची ईडीकडे तक्रार केली आहे. या तीन साखर कारखान्यांनी सुमारे शंभर कोटींचा साखर घोटाळा केला असून, त्यावर गुन्हे दाखल झाले आहेत.

त्याची ईडीच्या मार्फत चौकशी करण्यात यावी, यासाठी मी गेल्या आठवड्यात तक्रार दिली आहे, असे सांगून ते म्हणाले, की ईडीला मी आता पुन्हा एक स्मरणपत्र देणार आहे. त्यानंतरही संबंधित कारवाई झाली नाही, तर मी उच्च न्यायालयात दाद मागणार आहे. सोलापूर जिल्ह्यातील बार्शी, अक्कलकोट आणि सांगोला या तीन तालुक्यांतील कारखान्यांमध्ये हा साखर घोटाळा झाला आहे.

सोलापूरच्या डीसीसी बँकेच्या कर्जवाटपाबाबत राऊत म्हणाले, डीसीसी बँकेच्या तत्कालीन संचालकांनी बेकायदेशीर कर्ज वाटप केले आहे. हायकोर्टाने सुमारे 1 हजार कोटींची वसुली निश्चित केली असून, त्यानुसार कारवाईचे आदेश दिले आहेत.

वसुली आणि जप्तीची कारवाई सुरू झाली आहे. मात्र, त्याला स्थगिती मिळावी, यासाठी सहकार मंत्र्यांकडे अपील करण्यात आले आहे. त्यावर निर्णय होणे अपेक्षित होते. मात्र, अजून त्यांनी सुनावणी सुरू केलेली नाही. हा विषय लवकरात लवकर निकाली काढावा, असे उच्च न्यायालयाने सांगितले आहे.

सत्तेतील संचालकांवर पण कारवाई होणार : राऊत

ते म्हणाले, एक हजार कोटीच्या वसुलीसाठी उच्च न्यायालयाने टाइम बॉण्ड दिला होता, त्यासाठीच मी सहकार मंत्र्यांकडे पुन्हा जाऊन या सर्व गोष्टी त्यांच्यापुढे मांडणार आहे. मला खात्री आहे की, ते लवकरात लवकर सुनावणी घेतील.

बेकायदेशीर कर्ज घेणारे संचालक आज जरी सत्तेत बसले असले तरी त्यांच्यावर कारवाई होणार आहे. निवडणूक घेऊ नये; म्हणून मी प्रयत्न करत आहेत. मंगळवेढ्यातील एक सोसायटी डीसीसी बॅंकेची निवडणूक घेण्यासाठी उच्च न्यायालयात गेली आहे, पण मी त्याच्याविरोधत उच्च न्यायालयात अर्ज केला आहे, असे राऊत यांनी म्हटले आहे.