Sugar Production: देशात जुलैअखेर साखरेचे २५८ लाख टन उत्पादन

Kolhapur News: देशात साखरेचा मुख्य हंगाम संपला असला तरी कर्नाटक व तमिळनाडू या राज्यातून विशेष हंगामास सुरुवात झाली आहे. राष्ट्रीय सहकारी साखर कारखाना महासंघाने दिलेल्या माहितीनुसार जुलैअखेर देशातील साखर उत्पादन २५८.२० लाख टन झाले आहे. हे उत्पादन गेल्या वर्षीच्या ३१६ लाख टनांपेक्षा १८.३८ टक्क्यांनी कमी आहे.

जुलैअखेरपर्यंत कर्नाटकातील सात आणि तमिळनाडूतील नऊ कारखाने सप्टेंबरअखेर सुरू राहिल्याने देशातील साखर उत्पादन २६१ लाख टनांपर्यंत पोहोचण्याचा अंदाज आहे. हा अंदाज २०२४-२५ या वर्षात राज्यनिहाय साखर कारखान्यांत झालेल्या उस गाळप अहवालाच्या आधारे काढण्यात आला आहे.

२०२५-२६ च्या साखर हंगामाबद्दल राष्ट्रीय सहकारी साखर कारखाना महासंघ आशावादी आहे. महाराष्ट्र आणि कर्नाटकमध्ये वाढलेली ऊस लागवड आणि केंद्राकडून वेळेवर वाढ केलेली उसाची रास्त आणि किफायतशीर किंमत यामुळे साखरेचे एकूण उत्पादन ३५० लाख टनांपर्यंत वाढण्याची अपेक्षा असल्याचे महासंघाने म्हटले आहे.

२०२४-२५ मध्ये ५३४ साखर कारखाने सुरू होते. मुख्य हंगाम संपल्यानंतरही देशात १६ कारखाने सुरू आहेत. गेल्या वर्षी याच कालावधीत १२ कारखाने सुरू होते. यंदा उसाची लागवड जादा असल्याने कर्नाटकात ७ कारखाने मुख्य हंगामानंतर सुरू झाले. तर तमिळनाडूत ९ कारखाने सुरू आहेत. सध्या ५३४ पैकी ५१८ कारखाने बंद आहेत. जुलैअखेर २ हजार ७७७ लाख टन उसाचे गाळप झाले. यातून ९.३० टक्के रिकव्हरीने २५८ लाख टन साखर तयार झाली. मुख्य हंगाम संपल्यानंतर काही महिन्यानंतर कर्नाटक व तमिळनाडूत विशेष हंगामाला सुरुवात झाली आहे. हा हंगाम आणखी दोन महिने चालण्याची शक्यता आहे.

फीडस्टॉकमधून फक्त ३८ टक्के पुरवठा

राष्ट्रीय सहकारी साखर कारखाना महासंघाने, पेट्रोलमध्ये २० टक्के इथेनॉल मिश्रणाचे उद्दिष्ट भारताने निर्धारित कालावधीपेक्षा पाच वर्षे अगोदरच साध्य केल्याबाबत समाधान व्यक्त केले. सध्या एकूण ११२६ कोटी लिटर झालेल्या इथेनॉल वाटपाच्या तुलनेत फक्त ३८ टक्के पुरवठा साखर-आधारित फीडस्टॉकमधून झाला आहे, तर ६२ टक्के धान्य-आधारित स्रोतांमधून आला आहे. हा बदल अधिक फीडस्टॉक विविधीकरण दर्शवितो पण भविष्यातील धोरणांबाबतचे प्रश्‍नही उपस्थित करत असल्याचे महासंघाचे म्हणणे आहे.